skanda movie review: రివ్యూ స్కంద.. రామ్‌-బోయపాటి కాంబినేషన్‌ మెప్పించిందా?

Skanda movie review | చిత్రం: స్కంద; నటీనటులు: రామ్‌, శ్రీలీల, సయీ మంజ్రేకర్, ప్రిన్స్‌ సిసిల్‌, శరత్‌ లోహితాశ్వ, దగ్గుబాటి రాజా, ప్రభాకర్‌, శ్రీకాంత్‌ తదితరులు; సంగీతం: ఎస్‌. తమన్‌; ఎడిటింగ్‌: తమ్మిరాజు; సినిమాటోగ్రఫీ: సంతోష్‌ దేటేక్‌; నిర్మాత: శ్రీనివాస చిట్టూరి, పవన్‌ కుమర్‌; రచన, దర్శకత్వం: బోయపాటి శ్రీను; విడుదల: 28-09-2023

మాస్ సినిమాల‌కి పెట్టింది పేరు... బోయ‌పాటి శ్రీను. ఆయ‌న ద‌ర్శ‌క‌త్వంలో రామ్ అన‌గానే ఆ క‌ల‌యిక‌పై ప్రేక్ష‌కుల్లో ప్ర‌త్యేక‌మైన ఆస‌క్తి  ఏర్ప‌డింది.  బోయ‌పాటి మార్క్  సినిమాలో ఎన‌ర్జిటిక్ హీరో రామ్ ఎలా క‌నిపిస్తాడో చూడాల‌నే ఉత్సుక‌త ఏర్ప‌డింది.  విజ‌య‌వంత‌మైన ‘అఖండ‌’ త‌ర్వాత ఆ స్థాయి.. అంచ‌నాల‌కి త‌గ్గ‌ట్టుగానే  పాన్ ఇండియా స్థాయిలో ‘స్కంద‌’ చేశారు బోయ‌పాటి శ్రీను.  మ‌రి ఈ చిత్రం ఎలా ఉంది?(Skanda movie review) రామ్ - బోయ‌పాటి క‌ల‌యిక మాస్ ప్రేక్ష‌కుల్ని ఏ మేర‌కు మెప్పించింది?

క‌థేంటంటే: పెళ్లిపీట‌ల‌పై కూర్చున్న ఆంధ్ర‌ప్ర‌దేశ్ సీఎం కూతురిని... తెలంగాణ సీఎం అబ్బాయి వ‌చ్చి తీసుకెళ‌తాడు. దాంతో ఇద్ద‌రి సీఎంల మ‌ధ్య వైరం మొద‌ల‌వుతుంది. ఒక‌రినొక‌రు అంతం చేసుకునే వ‌ర‌కూ వెళుతుంది. ఆంధ్రా సీఎం ఓ యువ‌కుడిని రంగంలోకి దింపుతాడు. అత‌ను మామూలోడు కాదు. ఎవ్వ‌రినైనా ఎదిరించి అనుకున్న‌ది సాధించే ర‌కం. ఆ యువ‌కుడు క‌ట్టుదిట్ట‌మైన భ‌ద్ర‌త‌ని కాద‌ని తెలంగాణ సీఎం ఇంట్లోకి అడుగు పెట్టాడా? ఇద్ద‌రు ముఖ్య‌మంత్రుల కూతుళ్ల‌నీ కిడ్నాప్ చేసి రుద్ర‌రాజ‌పురం తీసుకెళ్లిన యువ‌కుడు (రామ్‌) ఎవ‌రు? ఇంత‌కీ ఆ ఊళ్లో ఎవ‌రున్నారు? (Skanda movie review) ఈ కిడ్నాప్‌ల‌కీ క్రౌన్ గ్రూఫ్ కంపెనీస్ అధినేత రామ‌కృష్ణంరాజు (శ్రీకాంత్‌)కీ మ‌ధ్య సంబంధం ఏమిటి? త‌దిత‌ర విష‌యాలు తెలియాలంటే సినిమా చూడాల్సిందే.

ఎలా ఉందంటే: మాస్ సినిమాకి చాలా నిర్వ‌చ‌నాలు ఉన్నాయి. అందులో బోయ‌పాటి మాస్  ప్ర‌త్యేకం. ఆయ‌న శైలి మేకింగ్‌, పాత్ర‌ల‌తో ప్ర‌త్యేక‌మైన బ్రాండ్‌ని సృష్టించుకున్నారు. శక్తిమంతంగా క‌నిపించే ఆయ‌న హీరోలు సూప‌ర్‌మేన్ త‌ర‌హాలో వీర‌విహారం చేస్తుంటారు. పాత్రలు న‌డుచుకునే తీరునీ, పోరాట ఘ‌ట్టాల్ని లార్జ‌ర్ దేన్ లైఫ్ త‌ర‌హాలో తెర‌పై ఆవిష్క‌రించి మాస్‌కి అస‌లు సిస‌లు సినిమాటిక్ అనుభూతిని పంచుతుంటారు.  (Skanda movie review) ఆ నేప‌థ్యంలోనూ త‌ను చెప్పాల‌నుకున్న విష‌యాన్ని మంచి భావోద్వేగాల‌తో చెబుతుంటారు ‘స్కంద‌’ సినిమాతోనూ అదే ప్ర‌య‌త్నం చేశారు బోయ‌పాటి. మాస్‌కి జాతరే ఈ సినిమా. రామ‌కృష్ణంరాజు పాత్ర‌తో సినిమాని మొద‌లుపెట్టిన ద‌ర్శ‌కుడు, ఇద్ద‌రు ముఖ్య‌మంత్రుల్ని, వాళ్ల సామ్రాజ్యాన్ని ఆవిష్క‌రించాక హీరోని ప‌రిచ‌యం చేస్తాడు. అక్క‌డ్నుంచి అస‌లు సినిమా మొద‌ల‌వుతుంది. హీరో హీరోయిన్ల మ‌ధ్య కాలేజీ డ్రామా, పాట‌లు, యాక్ష‌న్ ఘ‌ట్టాలు, ఆస‌క్తిక‌ర‌మైన మ‌లుపుల‌తో ప్ర‌థ‌మార్ధాన్ని న‌డిపించాడు ద‌ర్శ‌కుడు. వ‌ర్త‌మాన రాజ‌కీయాలు, ఉచిత ప‌థ‌కాలపై చుర‌క‌లు వేస్తూ కొన్ని స‌న్నివేశాల్ని తీర్చిదిద్దారు.

రాహుల్‌, న‌వీన్‌, రామ‌కృష్ణంరాజు త‌దిత‌ర పాత్ర‌ల‌తో నిజ జీవితంలోని వ్య‌క్తులు గుర్తుకొస్తారు. ప్ర‌థ‌మార్ధం సినిమా బోయ‌పాటి మార్క్ వీరోచిత పోరాట ఘ‌ట్టాల‌తో యాక్ష‌న్ ప్రియుల్ని అల‌రిస్తుంది. విరామ స‌న్నివేశాలు మ‌రింత హైలైట్‌. ద్వితీయార్ధంలో అస‌లు క‌థ ఉంటుంది. ఫ్లాష్‌బ్యాక్ ఎపిసోడ్ కీల‌కం. ఆ ఎపిసోడ్స్‌తో కుటుంబ ప్రేక్ష‌కుల్ని క‌ట్టిప‌డేసేలా భావోద్వేగాల్ని పండించే ప్ర‌య‌త్నం చేశారు. పిలిస్తే పనోడు ప‌ల‌క‌డం వేరు, సొంత కొడుకు ప‌ల‌క‌డం వేరు...  వృద్ధాప్యంతో త‌ల్లిదండ్రులు త‌డ‌బ‌డుతున్న‌ప్పుడు ప‌క్క‌న మ‌నం లేక‌పోతే ఎలా? అంటూ ప‌ల్లెటూళ్లో తీర్చిదిద్దిన స‌న్నివేశాలు ఆలోచింప‌జేస్తాయి. (Skanda movie review in telugu) ప‌తాక స‌న్నివేశాల్లో  వ‌చ్చే మ‌రో మ‌లుపు సినిమాకి కీలకం. ఈ సినిమాకి రెండో భాగం కూడా ఉంద‌ని ప్ర‌క‌టించారు ద‌ర్శ‌కుడు.

ఎవ‌రెలా చేశారంటే: తెలంగాణ యాస‌తోపాటు...రాయ‌ల‌సీమ యాస‌లోనూ సంభాష‌ణ‌లు చెబుతాడు రామ్‌. ఆయ‌న పాత్ర ఇందులో ప‌లుమార్లు ఆశ్చ‌ర్యానికి గురిచేస్తుంది. రెండు కోణాల్లో సాగే ఆ పాత్ర‌లో రామ్ క‌నిపించిన విధానం, వైవిధ్యం ప్ర‌ద‌ర్శించిన తీరు ఆక‌ట్టుకుంటుంది. బోయ‌పాటి శైలికి త‌గ్గ‌ట్టుగా మారిపోయి పాత్ర‌లో ప‌రకాయ ప్ర‌వేశం చేశాడు. ఆయ‌న చేసిన పోరాట ఘ‌ట్టాలు, డ్యాన్స్‌లు సినిమాకి మ‌రింత ఆకర్షణీయంగా నిలిచాయి. (Skanda movie review)యావ‌రేజ్ అంటూ హీరో రామ్ ఆట‌ప‌ట్టిస్తాడు కానీ... శ్రీలీల త‌న అందంతోనూ, డ్యాన్స్‌లతో తాను యావ‌రేజ్ కాద‌ని చాటి చెబుతుంది. పాత్ర‌కి త‌గినంత ప్రాధాన్య‌మే ఉన్నా, ఉన్నంత‌లో ఆక‌ట్టుకుంటుంది. స‌యీ మంజ్రేక‌ర్ ప‌ల్లెటూరి పాట‌లోనూ... సినిమాకి కీల‌క‌మైన మ‌లుపులోనూ ఆమె క‌నిపిస్తుంది. రామ‌కృష్ణంరాజు పాత్ర‌లో శ్రీకాంత్, రామ్ తండ్రిగా ద‌గ్గుబాటి రాజా, ముఖ్య‌మంత్రుల పాత్ర‌లో అజ‌య్ పూర్క‌ర్‌, శ‌ర‌త్ లోహితాశ్వ మంచి అభిన‌యం ప్ర‌ద‌ర్శించారు. గౌత‌మి, ఇంద్ర‌జ‌, ప్రిన్స్‌, ప్ర‌భాక‌ర్‌... ఇలా  తెర‌పై బోలెడ‌న్ని పాత్ర‌లు క‌నిపిస్తాయి.

సాంకేతికంగా సినిమా ఉన్న‌తంగా ఉంది. బోయ‌పాటి సినిమాకి ఎలా కావాలో అలాంటి సంగీతం స‌మ‌కూర్చారు త‌మ‌న్. సంతోష్ దేట‌కే కెమెరా ప‌నిత‌నం బాగుంది. ప్ర‌తీ స‌న్నివేశం ఘ‌నంగా క‌నిపిస్తుంది. కూర్పు, ప్రొడ‌క్ష‌న్ డిజైన్‌... త‌దిత‌ర విభాగాలు మంచి ప‌నితీరుని క‌న‌బ‌రిచాయి. ద‌ర్శ‌కుడు బోయ‌పాటి శ్రీను మ‌రోసారి త‌న మార్క్ మాస్ సినిమాపై పూర్తి ప‌ట్టుని ప్ర‌ద‌ర్శించారు. క‌థ‌, క‌థ‌నం, ఎలివేష‌న్స్‌తో క‌ట్టిప‌డేశాడు. నిర్మాణం ఉన్న‌తంగా ఉంది. పాన్ ఇండియా సినిమా స్థాయికి త‌గ్గ‌ట్టే ఘ‌నంగా  ఉంది.

• బ‌లాలు
• + రామ్ న‌ట‌న‌, డ్యాన్స్‌
• + బోయ‌పాటి మార్క్ మాస్ అంశాలు
• + యాక్ష‌న్‌... భావోద్వేగాలు
• బ‌ల‌హీన‌త‌లు
• - అక్క‌డ‌క్క‌డా రొటీన్‌గా అనిపించే స‌న్నివేశాలు
• చివ‌రిగా: స‌్కంద‌... మాస్ జాత‌ర (Skanda movie review)
• గమనిక: ఈ సమీక్ష సమీక్షకుడి దృష్టి కోణానికి సంబంధించింది. ఇది సమీక్షకుడి వ్యక్తిగత అభిప్రాయం మాత్రమే!