Jailer: కథ చిన్నారుల చుట్టూ.. సినిమా హిట్టు.. ఇప్పుడు ‘జైలర్‌’ వంతు?

పిల్లల చుట్టూ తిరిగే కథలతో సినిమాలు తక్కువ సంఖ్యలో తెరకెక్కుతుంటాయి. కానీ, సెంటిమెంట్‌తోపాటు యాక్షన్‌ హంగులూ అద్దుకున్న ఆయా చిత్రాలు ప్రేక్షకుల్ని మెప్పించి, విజయాన్ని అందుకుంటాయి. ఇదే ఇతివృత్తంతో తెరకెక్కిన రజనీకాంత్‌ ‘జైలర్‌’ శుక్రవారం (jailer release date 2023) విడుదల కానున్న సందర్భంగా అలాంటి కొన్నింటిపై ఓ లుక్కేద్దాం..

కూతురు కోసం ఖైదీ సాహసం

అతడో కేసులో యావజ్జీవ కారాగార శిక్ష పడ్డ ఖైదీ. సత్ర్పర్తన కారణంగా శిక్ష తగ్గించి అధికారులు అతడిని విడుదల చేస్తారు. అప్పటి వరకు చూడని తన కూతురిని కలిసేందుకు ఎంతో ఆనందంగా బయలుదేరతాడు. అదే దారిలో చోటు చేసుకున్న ఓ ప్రమాదం నుంచి పోలీసు అధికారుల్ని కాపాడాల్సిన పరిస్థితి అతడికి ఎదురవుతుంది. తొలుత దానికి అంగీకరించకపోయినా తన చిన్నారి భవిష్యత్తు కోసం ఆ సాహసం చేస్తాడు. ఇది ఏ సినిమా స్టోరీనో ఇప్పటికే అర్థమై ఉంటుందిగా. అవును.. కార్తి (Karthi) హీరోగా దర్శకుడు లోకేశ్‌ కనగరాజ్‌ (Lokesh Kanagaraj) తెరకెక్కించిన ‘ఖైదీ’ (Kaithi). ఖైదీగా ఢిల్లీ పాత్రలో కార్తి ఒదిగిపోయారు. ఆయన కూతురిగా బేబీ మోనిక నటించింది. ఢిల్లీ కన్న కూతురిని కలుసుకుంటాడా, లేదా? అనే ఉత్కంఠకు గురిచేసే ఈ సినిమా అటు కోలీవుడ్‌, ఇటు టాలీవుడ్‌లో సంచలనం సృష్టించింది.

‘సర్దార్‌’లో ఇలా..

కార్తి హీరోగా దర్శకుడు పి. ఎస్‌. మిత్రన్‌ తెరకెక్కించిన స్పై యాక్షన్‌ థ్రిల్లర్‌ చిత్రం ‘సర్దార్‌’ (Sardar). ‘వన్‌ కంట్రీ వన్‌ పైప్‌లైన్‌’ అనే ప్రాజెక్టుకు ఓ ప్రైవేటు కంపెనీ శ్రీకారం చుడుతుంది. సామాజిక కార్యకర్త సమీరా థామస్‌ (లైలా) దాన్ని ఆపేందుకు ప్రయత్నిస్తుంది. ఆమె ఆకస్మిక మరణం అందరినీ దిగ్భ్రాంతికి గురిచేస్తుంది. ఆమెపై దేశ ద్రోహి ముద్ర పడడంతో ఆమె కొడుకుని చేరదీసేందుకు ఎవరూ ముందుకురారు. అనాథైన ఆ బాలుడికి ఇన్‌స్పెక్టర్‌ విజయ్‌ ప్రకాశ్‌ (కార్తి) ఎలాంటి సాయం చేశాడు? ఆ పైప్‌లైన్‌ వెనుక గుట్టును ఎలా బయటపెట్టాడు? అన్న కథాంశంతో రూపొందిన ఈ సినిమా హిట్‌గా నిలిచింది. ఈ సినిమాలో ఏజెంట్‌ చంద్రబోస్‌ అలియాస్‌ సర్దార్‌ అనే పాత్రలోనూ కార్తి నటించిన సంగతి తెలిసిందే.

క్రూరుడిలో మార్పు తెచ్చే చిన్నారి..

క్రీస్తు పూర్వం 500 సంవత్స‌రానికి చెందిన‌ త్రిగ‌ర్త‌ల సామ్రాజ్యాధినేత బింబిసారుడు. క్రూర‌త్వానికి ప్ర‌తీక అతడు. ఏ రాజ్య‌పైన అయినా కన్నువేస్తే త్రిగ‌ర్త‌ల సామ్రాజ్యంలో భాగ‌మ‌వ్వాల్సిందే. ఎదురు తిరిగిన వాడు ఎంత‌టి వాడైనా త‌న క‌త్తి వేటుకు మ‌ట్టి క‌ర‌వాల్సిందే. ఆ క‌త్తికి రాజ్య కాంక్ష‌.. అధికార దాహం త‌ప్ప త‌ర‌త‌మ భేదాలు లేవు. క‌నిక‌రం అస్స‌లు తెలియ‌దు. అధికారానికి అడ్డు వ‌స్తాడేమోన‌న్న ఉద్దేశంతో త‌న‌ క‌వ‌ల సోద‌రుడు దేవ‌ద‌త్తుడినీ చంపాల‌ని ప్ర‌య‌త్నిస్తాడు. మాయా దర్పణం ద్వారా వర్తమానంలోకి వచ్చిన బింబిసారుడిలో శాంభవి అనే పాప మార్పు తీసుకొస్తుంది. ఎమోషన్‌తో కూడిన ఈ ఫాంటసీ యాక్షన్‌ ఫిల్మ్‌ మరెదో కాదు ‘బింబిసార’ (Bimbisara). బింబిసారుడు, దేవదత్తుగా కల్యాణ్‌రామ్‌ (Nandamuri Kalyan Ram) ద్విపాత్రాభినయం చేసిన ఈ సినిమా మంచి విజయాన్ని దక్కించుకుంది. శాంభవిగా బేబీ శ్రీదేవి అలరించింది.

మనవడితో విక్రమ్‌..

ఎమోషన్స్‌ని అంతర్లీనంగా చూపిస్తూ కమల్‌ హాసన్‌ (Kamal Haasan) ప్రధాన పాత్రలో దర్శకుడు లోకేశ్‌ కనగరాజ్‌ తెరకెక్కించిన యాక్షన్‌ థ్రిల్లర్‌ చిత్రం ‘విక్రమ్‌’ (Vikram). ఇందులో తాత, మనవడి అనుబంధాన్ని తెరపైకి తీసుకొచ్చి హిట్‌ కొట్టారు. పోలీసు అధికారైన తన కొడుకు ప్రభంజన్‌ విధుల్లో భాగంగా మరణిస్తే.. అతడి కొడుకు (మాస్టర్‌ దర్శన్‌)ను కంటికి రెప్పలా చూసుకుంటాడు విక్రమ్‌. బ్లాక్‌స్క్వాడ్‌ మాజీ ఏజెంట్‌ అయిన విక్రమ్‌ (కర్ణన్‌).. తన కొడుకుని హత్య చేసిన వారిపై ప్రతీకారం తీర్చుకున్నాడా? విక్రమ్‌ అయిన తాను కర్ణన్‌గా ఎందుకు మారాల్సి వచ్చింది? తదితర అంశాలతో రూపొందిన ఈ సినిమా బాక్సాఫీసు వద్ద మంచి వసూళ్లు రాబట్టింది. ఇందులో విజయ్‌ సేతుపతి, ఫాహద్‌ ఫాజిల్‌ కీలక పాత్రల్లో మెప్పించారు.

‘జైలర్‌’లోనూ గ్రాండ్‌సన్‌..

నెల్సన్‌ (Nelson Dilipkumar) దర్శకత్వం వహించిన ‘జైలర్‌’ (Jailer) సినిమాలో రజనీకాంత్‌.. ఆరేళ్ల పిల్లాడికి తాతగా కనిపించనున్నారు. ఇటీవల విడుదలైన ట్రైలర్‌ చూస్తే.. తాత, మనవడి మధ్య అనుబంధం ఈ సినిమాలో ప్రధానాంశమని అర్థమవుతుంది. రజనీ ఆ బాలుడి (మాస్టర్‌ రిత్విక్) బూట్లు తుడవడం, కలసి భోజనం చేయడం తదితర సన్నివేశాలు ఇద్దరూ ఎంత ప్రేమగా ఉంటారో తెలియజేస్తాయి. పదవీ విరమణ అనంతరం ఆనందంగా జీవించే టైగర్‌ ముత్తువేల్‌ పాండియన్‌ (రజనీకాంత్‌) మళ్లీ ‘యాక్షన్‌’లోకి దిగడానికి కారణమేంటి? ఈ క్రమంలో మనవడిని చంపబోయే గ్యాంగ్‌ నుంచి ఎలా రక్షించాడు? అనేది తెలియాలంటే  సినిమా చూడాల్సిందే. ఈ చిత్రంలో తమన్నా, మోహన్‌లాల్‌, శివ రాజ్‌కుమార్‌, జాకీష్రాఫ్‌, రమ్యకృష్ణ, సునీల్‌ కీలక పాత్రలు పోషించారు. దాదాపు రెండేళ్ల తర్వాత రజనీకాంత్‌ తెరపై సందడి చేయనున్న చిత్రంకావడంతో సినీ అభిమానులు ఆసక్తిగా ఎదురుచూస్తున్నారు. మరి, గ్రాండ్‌సన్‌ సెంటిమెంట్‌తో తెరకెక్కిన ‘జైలర్‌’ ఎంతటి విజయం అందుకుంటుందో చూడాలి.