Vennira Aadai Nirmala: మా ఇంటికి హీరో తాగొచ్చి.. రాద్ధాంతం చేశాడు: సీనియర్‌ నటి

ఇంటర్నెట్‌ డెస్క్‌: 1965లో వచ్చిన ‘వెన్నిరాడై’ (తమిళ్‌)తో తెరంగేట్రం చేసి.. సినిమా పేరునే ఇంటి పేరుగా మార్చుకున్నారు నటి నిర్మల (Vennira Aadai Nirmala). తమిళ్‌, తెలుగు, మలయాళం, కన్నడ కలిపి 400కిపైగా చిత్రాల్లో నటించిన ఆమె ఇటీవలో ఓ యూట్యూబ్‌ ఛానల్‌కు ఇంటర్వ్యూ ఇచ్చారు. అలనాటి అగ్ర హీరోలు నందమూరి తారక రామారావు, అక్కినేని నాగేశ్వరరావు, కృష్ణ తదితరులతో తనకున్న అనుబంధాన్ని నెమరువేసుకున్న ఆమె.. ఓ కథానాయకుడు చేసిన గొడవనూ గుర్తుచేసుకున్నారు. ఆ హీరో పేరు చెప్పకుండా తనకు ఎదురైన చేదు అనుభవాన్ని ఇలా వివరించారు.

‘‘అప్పట్లో నేను నటించిన ఓ సినిమా చిత్రీకరణ పూర్తైన తర్వాత ఇంటికి చేరుకున్నా. ఆ చిత్ర హీరో మద్యం సేవించి.. మా ఇంట్లోకి వచ్చే ప్రయత్నం చేశాడు. తలుపులు వేసి ఉండడంతో వాటిని తెరవాలంటూ గట్టిగా అరిచాడు. ప్లీజ్‌.. నేనేం చేయను. ఇక్కడ నిద్రపోయి వెళ్లిపోతానంటూ రాద్ధాంతం చేశాడు. జరిగిన విషయాన్ని మరుసటి ఉదయం ఆ సినిమా దర్శక- నిర్మాతలకు చెప్పా. వారు నాకు నచ్చజెప్పే ప్రయత్నం చేశారు. ఇలాంటివి నాకు నచ్చవని బదులిచ్చి, ఆ చిత్రం నుంచి వైదొలిగా’’ అని నిర్మల తెలిపారు.

‘భక్త ప్రహ్లాద’తో తెలుగు ప్రేక్షకులకు పరిచయమైన ఈ తమిళ నటి ‘అవే కళ్లు’, ‘మూగనోము’, ‘బాల నాగమ్మ’ తదితర చిత్రాలతో మంచి గుర్తింపు పొందారు. కొన్నాళ్ల విరామం అనంతరం ‘శ్రీ సీతారాముల కల్యాణం చూతము రారండి’లో నటించారు. ఆ తర్వాత, ‘అధిపతి’, ‘కలిసుందాం రా’, ‘జయం మనదేరా’, ‘నిన్నే ప్రేమిస్తా’, ‘స్నేహం కోసం’, ‘అర్జున్‌’, ‘శంకర్‌దాదా ఎంబీబీఎస్‌’ తదితర హిట్‌ సినిమాల్లో కీలక పాత్రలు పోషించి విశేషంగా అలరించారు. నిర్మల చివరిగా 2010లో వచ్చిన ‘రగడ’ చిత్రంలో కనిపించారు.