కెంటకీలో ఉర్రూతలూగించిన సంగీత విభావరి

అమెరికా‌: కెంటకీ రాష్టంలోని లుయివిల్‌ నగరంలో కెంటకీ తెలుగు సంఘం ఆధ్వర్యంలో సంగీత విభావరి కార్యక్రమం ఉత్సాహంగా జరిగింది. ప్రముఖ సంగీత దర్శకుడు కోటి సారథ్యంలో ఆయన బృందం నిర్వహించిన ఈ కార్యక్రమానికి తెలుగు రాష్ట్రాలకు చెందిన ఎన్నారైలు భారీగా తరలివచ్చారు. కోటి స్వరపరచిన ఎన్నో హిట్ సినీ గీతాలను గాయనీగాయకులు ఆలపించారు. ప్రజాదరణ పొందిన ఈ పాటలకు ప్రేక్షకులు నృత్యాలు చేస్తూ సందడి చేశారు. కెంటకీ తెలుగు సంఘం అధ్యక్షురాలు లక్ష్మీ అడ్డాల మాట్లాడుతూ.. కరోనా నిబంధనల కారణంగా గత రెండేళ్లుగా ఎలాంటి కార్యక్రమాలూ నిర్వహించలేదని, కేసులు తగ్గుముఖం పట్టడం, కొవిడ్ నిబంధనలు సడలించడం వల్ల భారీగా ఈ కార్యక్రమం ఏర్పాటు చేసినట్టు తెలిపారు. బోర్డు, కార్యనిర్వాహక బృందాన్ని సభకు పరిచయం చేశారు. తందూరి ఫ్యూజన్ వారు ప్రేక్షకులకు విందు భోజనం అందించారు. ఉపాధ్యక్షుడు ప్రసాద్‌ నడింపల్లి వందన సమర్పణతో ఈ కార్యక్రమం ముగిసింది.