SHCCC ఆధ్వర్యంలో వైభవంగా శివ -విష్ణు ఆలయ ప్రాణ ప్రతిష్ఠ మహోత్సవం

స్టాక్‌టన్‌: కాలిఫోర్నియాలోని స్టాక్‌టన్‌ నగరంలో స్టాక్‌టన్‌ హిందూ కల్చరల్ అండ్ కమ్యూనిటీ సెంటర్ (ఎస్‌హెచ్‌సీసీసీ) ఆధ్వర్యంలో నిర్మించిన శివ విష్ణు ఆలయ ప్రాణ ప్రతిష్ఠ కార్యక్రమం అత్యంత వైభవోపేతంగా ముగిసింది. నాలుగు ఎకరాల స్థలంలో రూ.30కోట్లతో స్టాక్‌టన్‌లో అత్యంత సువిశాలంగా నిర్మించిన ఈ ఆలయ ప్రాంగణంలో యోగా సెంటర్‌ని కూడా ఏర్పాటు చేశారు. ఈ క్రమంలోనే ఆ ఆలయ ప్రాణ ప్రతిష్ట, సంప్రోక్షణ, కుంభాభిషేకం, ప్రారంభ కార్యక్రమాలను ఘనంగా నిర్వహించారు. 
ఐదు రోజుల పాటు శాస్త్రోక్తంగా జరిగిన క్రతువులు ఆదివారంతో ముగిశాయి. ఆలయ అధ్యక్షులు సంజీవ్ గోస్వామి, ఆలయ ఉపాధ్యక్షులు డా.రఘునాథ్ రెడ్డి, వైఖానస ప్రధాన అర్చకులు సత్యనారాయణ ఆచార్యులు, శ్రీధరాచార్యులు, శైవాగమ అర్చకులు సాయి వెంకటకృష్ణ తదితరులు ఈ కార్యక్రమానికి విచ్చేశారు. ప్రముఖ గురు వాసమ్మ ఆధ్వర్యంలో జరిగిన ఈ ఆధ్యాత్మిక సంరంభంలో ఆదివారం రోజు జరిగిన పలు కార్యక్రమాలకు ఎస్ఎఫ్‌వో ఇండియన్ కాన్సులేట్ సీజీఐ డా.టి.వి. నాగేంద్ర ప్రసాద్‌ దంపతులు ముఖ్య అతిథులుగా విచ్చేశారు. ముగింపు కార్యక్రమానికి స్టాక్‌టన్‌ పరిసర ప్రాంతాల్లోని స్థానికులు, తెలుగువారు, పంజాబీ కుటుంబాల వారు, భారతీయులు భారీ సంఖ్యలో తరలివచ్చి తీర్థప్రసాదాలు స్వీకరించారు. 

గత 12 ఏళ్లుగా ఈ దేవాలయ నిర్మాణం కోసం ఎంతగానో శ్రమించిన వెంకట్‌, లక్ష్మీ ఈమని, సంజీవ్‌, పింకీ గోస్వామి, ఉమా, రతన్‌ నాయుడు; ఫాతిమా, అనీశ్‌ ప్రకాశ్‌, పల్లవి, రఘునాథ్‌ రెడ్డి కుటుంబాల కృషి అభినందనీయమని నిర్వాహకులు కొనియాడారు. సిలికానాంధ్ర వ్యవస్థాపకులు ఆనంద్ కూచిభొట్ల, స్టాక్‌టన్‌ యూనివర్సిటీ ప్రొఫెసర్ భాస్కర్ జాస్తి దంపతులు, డాక్టర్ సుజీత్ పున్నమ్ దంపతులు, శేఖర్ రెడ్డి, ఆయన సతీమణి రాధికా రెడ్డి , డాక్టర్ బాబు రెడ్డిలతో పాటు పలువురు పంజాబీ కుటుంబాలకు చెందిన వారు సైతం తమ వంతు సహకారం అందించారు. 

ఆదివారం జరిగిన కార్యక్రమాలివే.. 
విశ్వక్సేన పూజ; గణపతి పూజ; పుణ్యహవాచనం; వాస్తు హోమాలు; వాస్తు పర్య అగ్నికరణం-విష్ణుపరివార్; మహా శాంతి అభిషేకం; కుంభ ఆరాధన; నిత్య హోమాలు; కళన్యాస హోమాలు; ప్రాయశ్చిత్త హోమాలు; శివ పరివార్-నాడి సంధానం; మహా పూర్ణాహుతి; ప్రధాన కుంభ ఆలయ ప్రవేశం; ప్రాణ ప్రతిష్ఠ (కుంభాభిషేకం); స్వాములకు అలంకారం; ధేను(గోమాత)దర్శనం; విప్ర దర్శనం; కన్య దర్శనం; సువాసిని దర్శనం; కుంభ దర్శనం; జ్వాలా దర్శనం; దర్పణ దర్శనం; కూష్మాండ బలి (బూడిద గుమ్మడికాయ) దర్శనం; ప్రథమ నివేదన; మహా నివేదన; మహా మంగళ హారతి; మంత్ర పుష్ప;నిర్వాహకులకు ఆశీర్వాదం; తీర్థ ప్రసాదం