Asia Cup Hockey 2022: డ్రాగా ముగిసిన భారత్‌ X పాకిస్థాన్‌ మ్యాచ్‌

జకార్తా: క్రీడాభిమానులు ఎంతగానో ఎదురుచూసిన భారత్‌, పాకిస్థాన్‌ మధ్య హాకీ మ్యాచ్‌ డ్రాగా ముగిసింది. హాకీ ఆసియా కప్‌లో దాయాది దేశాల మద్య సాగిన పోరు 1-1  గోల్స్‌తో డ్రా అయ్యింది. మ్యాచ్‌ ఆసాంతం భారత్‌ ఆధిపత్యం ప్రదర్శించగా.. చివర్లో పాక్‌ ఓ గోల్‌ చేసి ఓటమిని తప్పించుకుంది. మ్యాచ్‌ ప్రారంభం అయిన మొదటి క్వార్టర్‌లోనే భారత ఆటగాడు కార్తీ సెల్వమ్‌ అద్భుత గోల్‌ చేశాడు. ఆ తర్వాత రెండు క్వార్టర్లలో ఇరు జట్లు హోరాహోరీగా తలపడినప్పటికీ ఒక్క గోల్‌ కూడా నమోదు కాలేదు. చివరిదైన నాలుగో క్వార్టర్‌లో పాక్‌కు పెనాల్టీ కార్నర్‌ లభించగా దాన్ని అబ్దుల్‌ రాణా సద్వినియోగం చేసుకున్నాడు. దీంతో స్కోర్లు సమంగా నిలిచాయి. ఈ ఏడాది జరుగుతున్న సిరీస్‌లో ఇదే తొలి మ్యాచ్‌. ఈ రెండు జట్లూ ఆసియా కప్‌ను మూడేసి సార్లు గెలుచుకున్న విషయం తెలిసిందే.