Charger: బాక్సులో ఛార్జర్లకు ఆ రెండు కంపెనీలూ గుడ్‌బై!?

ఇంటర్నెట్‌ డెస్క్‌: రిటైల్‌ బాక్సులో ఛార్జర్‌ను తొలగించి కొత్త ఒరవడికి శ్రీకారం చుట్టింది యాపిల్‌. ఆ తర్వాత శాంసంగ్ సైతం అదే బాటను అనుసరించింది. ఇప్పుడు చైనాకు చెందిన రెండు కంపెనీలు సైతం బాక్సుల నుంచి ఛార్జర్‌ను తొలగించడానికి సన్నద్ధమవుతున్నాయని తెలిసింది. భారత్‌లో విక్రయించే ఫోన్ల విషయంలో ఛార్జర్‌ను తొలగించాలని వన్‌ప్లస్‌, ఒప్పో అనుకుంటున్నాయని ప్రముఖ టిప్‌స్టర్‌ ముకుల్‌ శర్మ పేర్కొన్నారు. విశ్వసనీయ వర్గాలు తెలిపాయని చెప్పారు. అయితే, దీనిపై రెండు కంపెనీలు అధికారికంగా ఎలాంటి ప్రకటనా చేయలేదు.

యాపిల్‌ అన్ని ఫోన్లకూ ఛార్జర్లను తొలగించింది. శాంసంగ్‌ సైతం తన ప్రీమియం ఫోన్లకు ఛార్జర్లను నిలిపివేసింది. బడ్జెట్‌ ఫోన్లకు మాత్రం కొనసాగిస్తోంది. అయితే, పర్యావరణ పరిరక్షణలో భాగంగానే తమ వంతుగా ఛార్జర్‌ను తొలగిస్తున్నట్లు కంపెనీలు చెబుతున్నాయి. కానీ, రిటైల్‌ బాక్సులో ఛార్జర్‌ను తొలగిస్తున్న కంపెనీలు.. విడిగా విక్రయిస్తూ సొమ్ము చేసుకుంటున్నాయి. గతంలో ఇయర్‌ఫోన్స్‌ను బాక్సుతో పాటు ఇచ్చిన సంస్థలు.. తర్వాత దాదాపు అన్ని కంపెనీలూ వాటిని తొలగించాయి. అదే తరహాలో ఇప్పుడు ఒక్కో కంపెనీ ఛార్జర్‌ను తొలగిస్తుండడం గమనార్హం.