నేటి నుంచి ఎన్టీఆర్‌ శతజయంతి ఉత్సవాలు

ఈనాడు, హైదరాబాద్‌: ఎన్టీఆర్‌ శతజయంతి ఉత్సవాలను శనివారం ఉదయం 7.30 గంటలకు ఎన్టీఆర్‌ ఘాట్‌ వద్ద కుటుంబ సభ్యుల ఆధ్వర్యంలో ‘ఎన్టీఆర్‌ మహోన్నతుడు’ అనే లఘుచిత్ర ప్రదర్శనతో ప్రారంభిస్తామని ఉత్సవ సమితి గౌరవ అధ్యక్షులు కె.రాఘవేంద్రరావు, దగ్గుబాటి పురందేశ్వరి శుక్రవారం ఓ ప్రకటనలో తెలిపారు. ఏపీ, తెలంగాణ రాష్ట్రాల్లో నెలకొక ప్రాంతంలో శతజయంతి ఉత్సవాలను నిర్వహిస్తామని ప్రకటించారు. తొలుత జూన్‌ 4వ తేదీ ఉదయం 10.30 గంటలకు మేడసాని మోహన్‌ అవధానంతో తిరుపతిలో నెలవారీ కార్యక్రమాలు ప్రారంభిస్తామన్నారు. ఆ తర్వాత ఒంగోలు, విజయవాడ, రాజమహేంద్రవరం, వైజాగ్‌, వరంగల్‌, ఖమ్మం, నిజామాబాద్‌, హైదరాబాద్‌ తదితర ప్రాంతాల్లో కార్యక్రమాలుంటాయి. వివిధ రంగాల్లో కృషి చేసిన ప్రసిద్ధులకు ఈ సందర్భంగా ఎన్టీఆర్‌ గౌరవ పురస్కారాలు అందజేస్తారు. విజయవాడ, హైదరాబాద్‌లలో రెండు మెగా కార్యక్రమాలు నిర్వహించి ఎన్టీఆర్‌తో అనుబంధం ఉన్న నటీనటులు, రాజకీయ నాయకులను సన్మానిస్తారు. ఈ సమితి కన్వీనర్‌గా బాలకృష్ణ, సభ్యులుగా జస్టిస్‌ జాస్తి చలమేశ్వర్‌, పరుచూరి గోపాలకృష్ణ తదితరులున్నారు.