Cyber Crime: ఎన్నికల సందట్లో సైబర్‌ వల.. ఆ లింకులు క్లిక్‌ చేయొద్దు

బోధన్‌ పట్టణం, న్యూస్‌టుడే: ఎన్నికల వేళ ఎవరి హడావుడిలో వారుంటే.. సందట్లో సడేమియా అన్నట్లు జాతీయ నాయకులు, పార్టీల పేర్లు వాడుకొని సైబర్‌ నేరగాళ్లు హల్‌చల్‌ చేస్తున్నారు. ఈ మేరకు సామాజిక మాధ్యమాల్లో ఇప్పటికే ఒక సందేశం విపరీతంగా చక్కర్లు కొడుతోంది. ఓ జాతీయ పార్టీ మూడు నెలలు ఉచితంగా ఫోను రీఛార్జ్‌ చేస్తుందంటూ వాట్సప్‌, ఫేస్‌బుక్‌లో పోస్టులు, సందేశాలు వస్తున్నాయి. ‘ఉచిత రీఛార్జ్‌ కోసం దిగువ చూపిన లింకును గడువులోగా క్లిక్‌ చేసి నమోదు చేసుకోండి’ అని అందులో సూచిస్తున్నారు. దీనికి ఓ పార్టీ అధికారిక వెబ్‌సైటుకు దగ్గరగా ఉండే వెబ్‌ చిరునామా లింకు ఇచ్చారు.

రాష్ట్రమంతా ఎన్నికల సందడి నెలకొనడంతో ఈ సందేశం బాగా వైరల్‌ అవుతోంది. ఇదే సందేశం ఆర్నెల్ల కిందట మార్చిలోనూ వైరల్‌ కాగా, కేంద్ర ప్రభుత్వానికి చెందిన ‘ప్రెస్‌ ఇన్ఫర్మేషన్‌ బ్యూరో’ ఫ్యాక్ట్‌ చెక్‌లో అది నిజం కాదని తేల్చారు. ఇప్పటివరకు ఈ లింకులో నమోదు చేసుకొని నష్టపోయినట్లు ఎలాంటి ఘటనలు వెలుగులోకి రాకపోయినా.. ఎన్నికల సమయంలో కొందరైనా మోసపోవడానికి ఆస్కారముంది. ‘‘పండుగల సమయం కూడా కావడంతో అభ్యర్థులు, పార్టీలు వివిధ రకాల రాయితీలు ఇస్తున్నట్లు ప్రముఖ ఈ-కామర్స్‌ సంస్థల పేర్లకు దగ్గరగా ఉండే లింకులతో నమ్మించేందుకు కేటుగాళ్లు ప్రయత్నిస్తారు. వాటిని తెరిస్తే బ్యాంకు ఖాతాలు ఖాళీ అయ్యే ప్రమాదముంది. ఈ తరుణంలో పార్టీల పేరిట ఉచితాలు, రాయితీలంటూ వచ్చే సామాజిక మాధ్యమ లింకులతో అప్రమత్తంగా ఉండటం అవసరం. ఎన్నికల ప్రవర్తనా నియమావళి అమలులో ఉన్న సమయంలో పార్టీల తరఫున ఇలాంటి బహిరంగ ఆఫర్లు ఇవ్వరన్న విషయం గుర్తించాలి’’అని అధికారులు సూచిస్తున్నారు.