రచయితలపై దాడుల విషయంలో ప్రభుత్వం మౌనం సరికాదు

తెలంగాణ నిర్బంధ వ్యతిరేక వేదిక

ఈనాడు, హైదరాబాద్‌: కాకతీయ యూనివర్సిటీలో సమూహ కవులు, రచయితలపై ఏబీవీపీ జరిపిన భౌతిక దాడి విషయంలో రాష్ట్ర ప్రభుత్వం మౌనంగా ఉండడం అరాచక శక్తులకు ఆజ్యం పోస్తోందని తెలంగాణ నిర్బంధ వ్యతిరేక వేదిక మండిపడింది. మత విద్వేషాలు రెచ్చగొడుతూ దాడులకు పాల్పడే ధోరణి ఆందోళన కలిగిస్తోందని వేదిక కన్వీనర్‌ ప్రొఫెసర్‌ జి.హరగోపాల్‌, కో కన్వీనర్లు ప్రొఫెసర్‌ జి.లక్ష్మణ్‌, ఎం రాఘవాచారి, కె.రవిచందర్‌ మంగళవారం ఓ ప్రకటనలో పేర్కొన్నారు. ‘‘రాష్ట్రవ్యాప్తంగా ప్రజాస్వామ్య, లౌకిక భావన పెంపొందించడానికి కేంద్ర సాహిత్య అకాడమీ గ్రహీతలు, రచయితలు, యువ కవులు సమూహ వేదిక ఏర్పాటు చేసుకుని సభలు నిర్వహిస్తున్నారు. కేయూ వీసీ అనుమతితో ఆయనే ముఖ్య అతిథిగా శాంతియుతంగా నిర్వహిస్తున్న సమావేశంలో ఏబీవీపీ మూకలు చొరబడి కవులు, రచయితల్ని బూతులు తిడుతూ అడ్డుకున్నాయి. బయటకు వస్తుంటే భౌతిక దాడులు చేశారు. దాడులకు పాల్పడిన వారిపై కఠిన చర్యలు తీసుకోవాలి’’ అని వారు డిమాండ్‌ చేశారు.