Israel: ఇజ్రాయెల్‌ దాడిలో లెబనీస్‌ మేయర్‌ మృతి

బీరూట్‌: ఇజ్రాయెల్‌ (Israel) సైన్యం సోమవారం జరిపిన దాడిలో లెబనాన్‌ (Lebanon)లోని టెబే గ్రామానికి చెందిన మేయర్‌ హుస్సేన్‌ మాన్సూర్‌ మృతి చెందారు. ఇజ్రాయెల్‌ ప్రయోగించిన బాంబు ఆయనపై పడటంతో అక్కడికక్కడే ప్రాణాలు విడిచారు. ఆ బాంబు పేలకపోవడం గమనార్హం. పేలి ఉంటే మరింత ప్రాణనష్టం జరిగి ఉండేది. హుస్సేన్‌ మృతిని బంధువులు ధ్రువీకరించారు. ఈ ఘటనపై ఇజ్రాయెల్‌ సైన్యం, లెబనాన్‌ ప్రభుత్వం ఇంకా స్పందించలేదు. 

ఇజ్రాయెల్‌-హమాస్‌ మధ్య యుద్ధం గత రెండు నెలలుగా కొనసాగుతున్న విషయం తెలిసిందే. హమాస్‌ మిలిటెంట్లను మట్టుబెట్టడమే లక్ష్యంగా ఇజ్రాయెల్‌ సైన్యం గాజాపై దాడులు చేస్తుండగా.. ఆ మిలిటెంట్లకు మద్దతుగా లెబనాన్‌లోని హెజ్‌బొల్లా గ్రూప్‌ ఇజ్రాయెల్‌పై దాడికి దిగుతోంది. ఆదివారం కూడా డ్రోన్ల సాయంతో దాడులకు పాల్పడింది. దీనికి ప్రతీకారంగా ఇజ్రాయెల్‌.. దక్షిణ లెబనాన్‌లోని పలు గ్రామాలు, పట్టణాలపై సోమవారం ఎయిర్‌స్ట్రైక్‌ నిర్వహించింది. ఈ క్రమంలోనే హుస్సేన్‌ మృతి చెందారు. 

హెజ్‌బొల్లా దాడులపై ఇజ్రాయెల్‌ ప్రభుత్వ ప్రతినిధి ఎలాన్‌ లేవీ మాట్లాడుతూ.. ఒకేసారి రెండు దేశాలతో యుద్ధం చేసే ఆసక్తి తమకు లేదని స్పష్టం చేశారు. అయితే, హెజ్‌బొల్లా గ్రూప్‌ ఇలాగే కవ్విస్తూ యుద్ధానికి కాలు దువ్వితే.. ఈ ఉగ్రవాదులతోపాటు లెబనాన్‌ కూడా తీవ్ర పరిణామాలు ఎదుర్కొవాల్సి వస్తుందని హెచ్చరించారు.