ఒకవైపు పిల్లలకు ఎంతగానో ఉపయోగపడుతూ, మరోవైపు వారిలో కాస్త సృజనాత్మకతనూ పెంచాలనుకుంటున్నారా... అయితే మార్కెట్లో దొరుకుతున్న ‘పెయింట్‌ యువర్‌ ఓన్‌ మనీ బాక్స్‌’ను బహుమతిగా ఇచ్చేయండి. ఎన్నో వెరైటీల్లో కిడ్డీ బ్యాంకులు వస్తున్నా... ఇది మాత్రం చిన్నారులకు తప్పకుండా నచ్చుతుంది. ఎందుకంటే టెడ్డీబేర్‌, యూనికార్న్‌, రాకాసిబల్లీ, బాతూ, పిగ్గీ... ఇలా బోలెడన్ని బొమ్మలతో వచ్చే ఈ డబ్బుల పెట్టెకి జతగా రంగులూ, డెకరేషన్‌ స్టోన్స్‌, పెయింట్‌ బ్రష్‌ కూడా వస్తాయి. సాదాగా ఉండే ఆ బొమ్మను చిన్నారులు ఎవరికి నచ్చినట్టు వాళ్లు రంగులు వేసుకుని డిజైన్‌ చేసుకోవచ్చన్నమాట. సొంతంగా తయారుచేసుకున్న ఆ కిడ్డీబ్యాంకును అపురూపంగా చూసుకుంటూ ఇంట్లోవాళ్లు ఇచ్చే డబ్బుల్ని దాచుకోవచ్చు.