హృదయం ఇక్కడున్నది!

చుట్టూ నీళ్లు... మధ్యలో రిసార్ట్‌తో ఉన్న ఈ దీవిని చూశారంటే- తప్పకుండా ప్రేమలో పడిపోతారు. హృదయాకారంలోని ఈ దీవి రూపమే దీని అసలైన ప్రత్యేకత. ఐలాండ్‌ మధ్యలో హోటళ్లూ రిసార్టులూ చాలానే ఉండొచ్చు కానీ ఈ దీవి హృదయాకారంలో పచ్చని చెట్లతో ఎంతో అందంగా ఉంటుంది మరి. అందుకే ఎందరెందరో ప్రేమికులు ఇక్కడికి వస్తుంటారు. మేక్‌పీస్‌ ఐలాండ్‌గా పిలిచే ఈ దీవి ఆస్ట్రేలియాలోని నూసా నది మధ్యలో ఉంటుంది. ఈత కొలను, థియేటర్‌, రెస్టరంట్‌, ఆట మైదానాలతో ఉండే ఈ దీవిలోకి కొన్నేళ్ల క్రితం వరకూ బయటివారికి అనుమతి ఉండేది కాదు. హార్ట్‌ షేప్‌లోని ఈ ఐలాండుకున్న క్రేజ్‌ విపరీతంగా పెరిగిపోవడంతో 2009 నుంచి పర్యటకులకూ అనుమతి ఇచ్చారు ఈ దీవి యజమానులు. 30 మంది అతిథులు బస చేసేలా గదుల్ని ఏర్పాటుచేసి ఇతర హంగుల్నీ అద్దారు. మిగతా వారి సంగతి ఎలా ఉన్నా... మనసులోని ప్రేమను కళ్లముందూ చూపాలనుకునే ప్రేమికులు మాత్రం తరచూ ఇక్కడ వాలిపోతుంటారట. వాలెంటైన్స్‌ డే రోజుకైతే బుకింగ్‌ కోసం ముందు నుంచే క్యూలో ఉంటారట!