రోబోలు... అనేక పనుల్లో మనకు సాయపడటానికి సృష్టించినవి. మన ఆజ్ఞలను పాటిస్తూ ఇళ్లలో, ఆఫీసుల్లో, కర్మాగారాల్లో పలు విధాలుగా ఇవి విధులు నిర్వహిస్తున్నాయి. అయితే పెరిగిన సాంకేతిక పరిజ్ఞానం పుణ్యమాని ఇప్పుడివి బాస్‌గానూ ఉద్యోగులకు ఆదేశాలిచ్చేస్తున్నాయి. ఆ దృశ్యాన్ని చైనాలోని మెటావర్స్‌ కంపెనీ అయిన నెట్‌డ్రాగన్‌ వెబ్‌సాఫ్ట్‌ అనే గేమింగ్‌ సంస్థలో చూడొచ్చు. గతేడాది ఆగస్టులోనే ఆ సంస్థ యాజమాన్యం ఆర్టిఫిషియల్‌ ఇంటెలిజెన్స్‌ ఆధారంగా నడిచే టాంగ్‌ యు అనే రోబోను సీఈవోగా నియమించింది. కానీ, మొదట్లో రోబోను నియమించడానికి ఎందరో ఉన్నతోద్యోగులు యాజమాన్యం నిర్ణయాన్ని వ్యతిరేకించారు. కానీ ఆర్నెల్లలో టాంగ్‌ యు పనితీరు, 10 శాతం పెరిగిన షేర్లు చూశాక అందరూ దాన్ని మెచ్చుకుంటున్నారు. మరికొన్ని సంస్థలూ ఇలాంటి హ్యుమనాయిడ్‌ రోబోలను ఉద్యోగంలో చేర్చుకోవడానికి మొగ్గుచూపుతున్నాయట.