దోమలు రాకుండా..!

దోమలు కుట్టడం వల్ల ఎంతోమంది ప్రాణాంతక వ్యాధులకు గురవుతున్నారు. దాంతో గదుల్లో మస్కిటో రిపెల్లెంట్ల వాడకం తప్పనిసరిగా మారింది. అయినా వాటి దారిన అవి వస్తూనే ఉన్నాయి. అక్కడికీ కొంతమంది అవి కుట్టకుండా రకరకాల రిపెల్లెంట్‌ స్ప్రేలనీ రాసుకుంటున్నారు. కానీ ప్రస్తుతం వాడుకలో ఉన్న రిపెల్లెంట్ల ప్రభావం రెండు గంటల తరవాత క్రమేణా తగ్గిపోతుంటుంది. పైగా అవన్నీ ఘాటైన వాసననీ కలిగి ఉంటాయి. ఇటలీకి చెందిన పిసా, ఫిరెంజె యూనివర్సిటీలకు చెందిన కొందరు పరిశోధకులు కొత్త ఫార్ములాతో సైక్లిక్‌ హైడ్రాక్సీఎసిటేల్స్‌ అనే పదార్థంతో కూడిన రిపెల్లెంట్‌ స్ప్రేను రూపొందించారట. ఇది కనీసం ఎనిమిది గంటలపాటు దోమల్ని అడ్డుకుంటుందట. కొత్తగా రూపొందించిన ఈ పదార్థం ఆహ్లాదకరమైన పరిమళాన్ని వెదజల్లడంతోబాటు ప్రస్తుతం ఉన్నవాటికన్నా త్వరగా నీళ్లలో కరిగిపోతుందనీ చెబుతున్నారు. కాబట్టి దీనివల్ల ఇతరత్రా దుష్పరిణామాలూ తక్కువేనట.