కేంద్ర పన్నుల్లో ఏపీకి రూ.49,364 కోట్లు

ఈనాడు, దిల్లీ: కొత్త ఆర్థిక సంవత్సరంలో కేంద్ర పన్నుల్లో వాటా కింద ఏపీకి రూ.49,364 కోట్లు, తెలంగాణకు రూ.25,639 కోట్లు రానున్నాయి. 2023-24 బడ్జెట్‌ కంటే ఏపీకి రూ.4,666 కోట్లు, తెలంగాణకు రూ.2,423 కోట్లు ఎక్కువ మొత్తం రానుంది. 15వ ఆర్థిక సంఘం నిర్దేశించిన దామాషాను అనుసరించి మొత్తం కేంద్ర పన్నుల్లో ఆంధ్రప్రదేశ్‌కు 4.047%, తెలంగాణకు 2.102% వాటాను కేంద్రం పంపిణీ చేస్తోంది. ఆర్థిక మంత్రి పొందుపరిచిన పద్దుల ప్రకారం అన్ని రాష్ట్రాలకు కలిపి.. గతం కంటే రూ.1,15,289 కోట్లు (10.43%) అధిక మొత్తం రానుంది. జీఎస్టీ పరిహారం లోటును భర్తీ చేయడానికి 2020-21, 2021-22ల్లో ఆంధ్రపదేశ్‌కు రూ.5,583.19 కోట్లు, తెలంగాణకు రూ.6,949.49 కోట్ల మేర రుణం ఇచ్చినట్లు కేంద్రం వెల్లడించింది.