బీ20 ఇండియా ఛైర్‌గా ఎన్‌. చంద్రశేఖరన్‌

దిల్లీ: టాటా సన్స్‌ ఛైర్మన్‌ ఎన్‌. చంద్రశేఖరన్‌ను బి20 ఇండియా ఛైర్‌గా ప్రభుత్వం నియమించిందని పరిశ్రమల సంఘం సీఐఐ పేర్కొంది. వచ్చే ఏడాది సెప్టెంబరులో జరిగే జి-20 సమావేశాలకు మన దేశం అధ్యక్షత వహిస్తున్న సంగతి తెలిసిందే. ఈ సమావేశాల్లో వ్యాపారాల అజెండాకు చంద్రశేఖరన్‌ బాధ్యత వహిస్తారు. బీ20 ఇండియా సెక్రటేరియట్‌గా సీఐఐను కేంద్రం ఇప్పటికే నియమించింది. ఇది బి20 ఇండియా ప్రక్రియను ముందుండి నడిపిస్తుంది. జి-20కి భారత్‌ అధ్యక్షత వహిస్తుందని డిసెంబరు 1, 2022న ప్రకటన వెలువడిన సమయంలోనే సీఐఐ బీ20 ఇండియా సెక్రటేరియట్‌ బాధ్యతలు చేపట్టింది. 2010లో ఏర్పాటైన బీ20లో జి-20కి చెందిన కంపెనీలు, వ్యాపార సంస్థలు భాగస్వాములుగా ఉంటాయి. ‘అంతర్జాతీయ భాగస్వామ్యాలను బలోపేతం చేసుకోవడం సరికొత్త వ్యాపార వ్యూహమని మేం విశ్వసిస్తున్నాం. తద్వారా ఆర్థిక స్థిరత్వం, ప్రగతి, వృద్ధి వేగవంతమవుతాయ’ని ఈ సందర్భంగా చంద్రశేఖరన్‌ పేర్కొన్నారు.