నిర్లక్ష్యపు జాడలో.. నీరెరగని కాలువలు

కందుకూరు వద్ద పీఏబీఆర్‌ కాలువ లైనింగ్‌ తీరు

కాలువల్లో నీరు పారినపుడే వ్యవసాయం ఆశాజనకంగా ఉంటుంది. అనంతపురం జిల్లాలో వ్యవసాయానికి కాలువలే ఆయువుపట్టు. అయితే వైకాపా పాలనలో కాలువల నిర్వహణ పూర్తిగా గాలికొదిలేశారు. పిచ్చి మొక్కలతోను, చెట్లు పెరిగి కాలువలు రూపు కోల్పోతున్నాయి. పీఏబీఆర్‌, పేరూరు జలాశయం, మిడ్‌పెన్నార్‌ జలాశయం కాలువలను ఐదేళ్లుగా పట్టించుకోలేదు. వీటిలో నీరు పారటమే గగనమైంది. ఈ రెండు జలాశయాల కాలువల కింద వందల ఎకరాల్లో ఆయకట్టు ఉంది. లైనింగ్‌ లేక చాలాచోట్ల కట్టలు బలహీనంగా మారుతున్నాయి. పీఏబీఆర్‌ కాలువ ఉరవకొండ, రాప్తాడు, ధర్మవరం, శింగనమల నియోజకవర్గాల్లో అనేక గ్రామాలకు సాగునీరు అందిస్తుంది. ఈ కాలువ పరిధిలో అనేక చెరువులను నింపేందుకు ఇదొక్కటే ఆధారం. భూగర్భజలాల పెరుగుదలకూ ఉపయోగపడుతుంది. పేరూరు జలాశయం కుడికాలువ పరిధిలో కనగానపల్లి, రాప్తాడు, రామగిరి మండలాల్లో 10 వేల ఎకరాల ఆయకట్టు ఉన్నా పూర్తిగా నిర్లక్ష్యం చేశారు. మిడ్‌పెన్నార్‌ డ్యాం నుంచి దక్షిణ కాలువ ద్వారా గార్లదిన్నె అనంతపురం రూరల్‌, బీకేఎస్‌, నార్పల, పుట్లూరు, యల్లనూరు మండలాలకు సాగునీరు అందితోంది. గత తెదేపా ప్రభుత్వ హయాంలో ఈ కాలువను ఆధునికీకరించారు. ఇదేళ్లుగా ఆధునికీకరణకు నోచుకోక కాలువలు ఆనవాళ్లు కోల్పోతున్నాయి. జలాశయాల్లో నీరున్నా కాలువకు వదిలే పరిస్థితే లేదంటే ఇది కచ్చితంగా వైకాపా ప్రభుత్వ వైఫల్యమే.. ఆయకట్టు రైతులకు ఇదంతా వేదన భరితమే. 

ఈనాడు, అనంతపురం

రాప్తాడు మండలం కందుకూరు వద్ద మట్టితో కప్పేసిన షట్టర్లు..

గార్లదిన్నె మండలం మర్తాడు వద్ద మిడ్‌పెన్నార్‌ దక్షిణకాలవ కట్ట దుస్థితి