ప్రాథమిక రాత పరీక్షకు పకడ్బందీ ఏర్పాట్లు

అభ్యర్థులు అరగంట ముందుగానే రావాలి   

ఎస్పీ రిషాంత్‌రెడ్డి

మాట్లాడుతున్న ఎస్పీ రిషాంత్‌రెడ్డి

చిత్తూరు (నేరవార్తలు), న్యూస్‌టుడే: జిల్లాలోని 33 పరీక్ష కేంద్రాల్లో ఆదివారం జరగనున్న పోలీసు కానిస్టేబుల్‌ ప్రిలిమినరీ రాత పరీక్ష పకడ్బందీగా నిర్వహిస్తామని  ఎస్పీ రిషాంత్‌రెడ్డి తెలిపారు. చిత్తూరు పోలీసు అతిథి గృహంలో శుక్రవారం ఆయన విలేకర్లతో మాట్లాడారు. జిల్లాలో 12,196 మంది అభ్యర్థులు పరీక్ష హాజరు కానున్నారని అందులో పురుషులు 9,719, మహిళలు 2,477 మంది ఉన్నట్లు చెప్పారు. ఆదివారం ఉదయం 10 గంటల నుంచి 1 గంటల వరకు వరకు పరీక్ష జరగనుందని, నిమిషం ఆలస్యమైనా అనుమతించమని చెప్పారు. అభ్యర్థులు కనీసం అరగంట ముందుగా కేంద్రానికి రావాలన్నారు. అభ్యర్థులు హాల్‌టికెట్‌తో పాటు గుర్తింపు కార్డు తప్పనిసరని, ఎలక్ట్రానిక్‌ పరికరాలు తీసుకురావద్దని కోరారు. కాపియింగ్‌, మాల్‌ ప్రాక్టీస్‌కు పాల్పడితే క్రిమినల్‌ కేసులు నమోద చేసి జీవితాంతం పోలీసు నియామకాల్లో ప్రవేశం ఉండదని హెచ్చరించారు. కేంద్రాల వద్ద 144 సెక్షన్‌ అమలులో ఉంటుందని, జిరాక్స్‌ కేంద్రాల మూసేయాలని నిబంధనలను అతిక్రమిస్తే చర్యలు తప్పవన్నారు. ఏఎస్పీ జగదీష్‌ పర్యవేక్షణలో సుమారు 452 మందిని బందోబస్తుగా ఏర్పాటు చేశామన్నారు. ఏఎస్పీ జగదీష్‌, తదితరులు పాల్గొన్నారు.