నయానా.. భయానా?

కీలకనేత ఆదేశాలతో వాలంటీర్లపై ఒత్తిడి
మూకుమ్మడిగా రాజీనామాలు

రాజీనామా పత్రాలు చూపుతున్న వాలంటీర్లు

చంద్రగిరి: గ్రామ వాలంటీర్లను ప్రభుత్వ కార్యక్రమాలకు దూరంగా ఉంచాలన్న ఎన్నికల కమిషన్‌ ఆదేశాలు అమలులో ఉండగా  వైకాపా నేతలు తమ పార్టీ తరఫున క్షేత్రస్థాయిలో పనిచేయాలని ఒత్తిడి పెంచుతున్నారు. ఈసీ ఆదేశాలతో పలువురు వాలంటీర్లపై వేటుపడటంతో అధికార పార్టీ కార్యక్రమాలకు వారు దూరంగా ఉంటున్నారు. ఈ పరిణామాలతో చంద్రగిరి నియోజకవర్గంలోని కీలక ప్రజాప్రతినిధి వాలంటీర్లతో రాజీనామా చేయించి ఎన్నికల ప్రచారంలో పాల్గొనేలా చూడాలంటూ దిగువ స్థాయి నాయకులకు హుకుం జారీచేశారు. దీంతో వారు రాజీనామా చేయకుంటే భవిష్యత్తులో ఇబ్బందిపడతారంటూ నయానా భయానా ఒప్పిస్తున్నారు. విధిలేని పరిస్థితిలో అంగీకరించిన కొందరిని వైకాపా నేతలే దగ్గరుండి మండల కార్యాలయాలకు తీసుకెళ్తున్నారు. నియోజకవర్గంలోని ఆరు మండలాల్లో 2,135 మంది ఉండగా ఇప్పటివరకు 852 మంది వాలంటీర్లు వ్యక్తిగత కారణాలు చూపుతూ ఎంపీడీవోలకు రాజీనామా పత్రాలు ఇచ్చారు. ఎలాంటి విచారణ లేకుండానే వెనువెంటనే అధికారులు ఆమోదముద్ర వేసి పంపిస్తున్నారు.