రూ.3 కోట్ల వజ్రం రూ.30లక్షలకే అంటూ మోసానికి యత్నం

నకిలీ వజ్రాన్ని చూపిస్తున్న డీసీపీ ఉదయ్‌కుమార్‌రెడ్డి

ఆసిఫ్‌నగర్‌, న్యూస్‌టుడే: రూ.కోట్ల విలువైన వజ్రాన్ని రూ.లక్షలకే విక్రయిస్తామని ప్రజలను నమ్మిస్తున్న ముఠాను హబీబ్‌నగర్‌ పోలీసులు అరెస్ట్‌చేశారు. సౌత్‌వెస్ట్‌ డీసీపీ ఉదయ్‌కుమార్‌రెడ్డి కథనం ప్రకారం.. ముంబాయి, ఠాగూర్‌నగర్‌ విక్రిల్‌ ఈస్ట్‌ ప్రాంతానికి చెందిన బాలచంద్ర తులేరే (48) మూడురోజుల క్రితం నగరానికి వచ్చాడు. తనదగ్గర రూ.3కోట్ల విలువ చేసే వజ్రం ఉందని, రూ.30 లక్షలకే ఇస్తానని ప్రజలను నమ్మించే ప్రయత్నం చేశాడు. పాతబస్తీ రియాసత్‌నగర్‌కు చెందిన ముస్తబా అహ్మద్‌ఖాన్‌, కంచన్‌బాగ్‌ హఫీజ్‌బాబానగర్‌ సి బ్లాక్‌ నివాసి సాజిద్‌ అలీలను సంప్రదించాడు. ముగ్గురు కలిసి నకిలీ వజ్రం విక్రయించేందుకు గురువారం మల్లేపల్లికి వచ్చారు. అనుమానంతో కొందరు పోలీసులకు సమాచారం చేరవేశారు. అక్కడికి చేరుకున్న ఇన్‌స్పెక్టర్‌ రాంబాబు బృందం నిందితులను అరెస్టు చేసి, నకిలీ వజ్రాన్ని స్వాధీనం చేసుకుంది. నిందితుల నేర చరిత్ర ఆరా తీస్తున్నట్లు డీసీపీ చెప్పారు.