అల్కాపురిలో ‘జీరో షాడో’ పరిశీలన

హైదరాబాద్‌: అల్కాపురిలో బంగారయ్య శర్మ ఆధ్వర్యంలో జరుగుతున్న శంకర జయంతి మహోత్సవాల్లో గురువారం శంకరమంచి రామకృష్ణ శాస్త్రి, శంకరమంచి శివ శూన్య ఛాయ(Zero Shadow)ను యంత్రాల ద్వారా పరిశీలించారు. ఈ సందర్భంగా శంకరమంచి మాట్లాడుతూ.. భూమి 23.5 డిగ్రీలు వంగి ఉన్న కారణంతో సూర్యుడి కాంతి (డిక్లినేషన్‌) 23.5 ఉత్తరం, 23.5 దక్షిణం మధ్య ఉంటుందన్నారు. సూర్యుడి డిక్లినేషన్ ఏ రోజైతే  మనం నివసించే ప్రాంతంలో అక్షాంశకు సమం అవుతుందో ఆరోజు మధ్యాహ్న సమయంలో సూర్యుడు మన ప్రాంతంలో సరిగ్గా 90 డిగ్రీల అల్టిట్యూడ్ వద్ద ఉంటాడని.. దీనివల్ల నిటారుగా ఉన్న వస్తువుల నీడ భూమిపై పడదని వివరించారు.  అందువల్లే  ఈరోజును శూన్య ఛాయా దినమని అంటామని తెలిపారు. సౌరశక్తి సంవత్సరం మొత్తంలో ఈరోజే ఎక్కువగా ఉంటుందన్న ఆయన.. ఈ శూన్య ఛాయను కర్కాటక రేఖ, మకరరేఖ మధ్య ఉన్న ప్రాంతాలలోనే గమనించవచ్చని వివరించారు. ఈ కార్యక్రమంలో నోరి నారాయణమూర్తి, రమేష్ గుప్త, అనంతలక్ష్మి, బంగారయ్యశర్మ, సతీష్ తదితరులు పాల్గొన్నారు.