అర్హులు ఓటరుగా నమోదు చేసుకోవాలి

ఓటరు నమోదుపై ఆరా తీస్తున్న కలెక్టర్‌ అనురాగ్‌ జయంతి

తంగళ్లపల్లి, న్యూస్‌టుడే: జిల్లాలో 18 సంవత్సరాలు పూర్తి చేసుకున్న యువతీ, యువకులందరూ ఓటర్ల్లుగా తమ పేర్లను నమోదు చేసుకోవాలని కలెక్టర్‌ అనురాగ్‌ జయంతి పేర్కొన్నారు. ఆదివారం తంగళ్లపల్లి మండల కేంద్రంలోని 8 పోలింగ్‌ బూత్‌లలో చేపట్టిన ప్రత్యేక ఓటరు నమోదు క్యాంపెయిన్‌ కార్యక్రమాన్ని కలెక్టర్‌ క్షేత్రస్థాయిలో పరిశీలించారు. ఓటరు నమోదుపై బూత్‌ స్థాయి అధికారులకు దిశా నిర్దేశం చేశారు. ఈ సందర్భంగా కలెక్టర్‌ మాట్లాడుతూ ఓటరు జాబితా ప్రత్యేక సవరణ-2023 కార్యక్రమంలో భాగంగా ఈ నెల 26, 27 తేదీల్లో, తిరిగి డిసెంబర్‌ 3, 4 తేదీలలో ప్రత్యేక ప్రచార కార్యక్రమాలు నిర్వహిస్తున్నట్లు తెలిపారు. ప్రతి పోలింగ్‌ కేంద్రం వారీగా అర్హులైన నూతన ఓటర్లను గుర్తించి నమోదు చేయాలన్నారు. 2023 జనవరి 1 నాటికి 18 సంవత్సరాలు నిండిన యువతీ, యువకులతోపాటు దివ్యాంగులు, ట్రాన్స్‌జెండర్‌లను ఫారం-6 ద్వారా ఓటర్లగా నమోదు చేయాలని ఆదేశించారు. ఈ కార్యక్రమం ద్వారా ఓటర్లు వారి వివరాలను మార్పులు, చేర్పులు చేసుకునేందుకు అవకాశం కల్పిస్తున్నట్లు చెప్పారు. బీఎల్‌వోలు ఇంటింటా సర్వే ద్వారా ఓటర్లను చైతన్యవంతులను చేయాలని సూచించారు. చనిపోయిన వారి వివరాలను జాబితా నుంచి తొలగించాలన్నారు. ఫారం -7 దరఖాస్తులను పరిశీలించి సదరు ఓటర్లు శాశ్వతంగా ఇతర ప్రాంతాలకు వలస వెళ్లారా? లేదా? అనే అంశాలను క్షుణ్ణంగా విచారించి నిర్ణయం తీసుకోవాలని సూచించారు. ఈ కార్యక్రమంలో తహసీల్దార్‌ సదానందం, బూత్‌ లెవల్‌ అధికారులు తదితరులు పాల్గొన్నారు.