32 కిలోల గంజాయి స్వాధీనం

పట్టుబడిన నిందితులతో పోలీసులు

ఖమ్మం నేరవిభాగం, న్యూస్‌టుడే: గంజాయి అక్రమంగా రవాణా చేస్తున్న ఒడిశా రాష్ట్రానికి చెందిన దంపతులను ఖమ్మం ఒకటో పట్టణ పోలీసులు సోమవారం అదుపులోకి తీసుకున్నారు. వారి నుంచి రూ.8 లక్షల విలువ చేసే 32 కిలోల గంజాయి, రూ.5 వేల నగదు స్వాధీనం చేసుకున్నారు. ఇన్‌స్పెక్టర్‌ ఉదయ్‌కుమార్‌ కథనం ప్రకారం... మిశాల్‌ అనే వ్యక్తి సూచన మేరకు సికింద్రాబాద్‌లో ఉంటున్న సంజయ్‌సింగ్‌కు గంజాయి అప్పగించేందుకు ఒడిశా రాష్ట్రం గజపతి జిల్లా బోమిక గ్రామానికి చెందిన భరత్‌ అలియానా, పద్మతుల అలియానా దంపతులు విశాఖపట్నం నుంచి రైలులో బయలుదేరారు. ఎవరికి అనుమానం రాకుండా సోమవారం ఖమ్మం రైల్వే స్టేషన్‌లో దిగి మరో రైలులో సికింద్రాబాద్‌ వెళ్లేందుకు సమీపంలో ఉన్న దేవాలయం వద్ద వేచి ఉన్నారు. అనుమానాస్పదంగా ఉన్న ఇద్దరినీ అదుపులోకి తీసుకుని తనిఖీ చేసి గంజాయిని గుర్తించారు. నిందితులపై కేసు నమోదు చేసి రిమాండ్‌కు తరలించామని, మిగిలిన ఇద్దరి కోసం గాలిస్తున్నామని ఇన్‌స్పెక్టర్‌ వివరించారు.