కర్నూలు నియోజకవర్గం చుట్టూ మూడు చెక్‌పోస్టులు

నిరంతరం నిఘా

కర్నూలు నేరవిభాగం, న్యూస్‌టుడే : కర్నూలు నియోజకవర్గం చుట్టూ 24 గంటలు నిఘా ఉంచేందుకు మూడు స్టాటస్టికల్‌ సరైలైన్స్‌ టీమ్‌లతో కూడిన చెక్‌పోస్టులను ఏర్పాటుచేస్తూ కర్నూలు అసెంబ్లీ నియోజకవర్గ ఎన్నికల అధికారి, కర్నూలు నగరపాలకసంస్థ కమిషనర్‌ భార్గవ్‌తేజ బుధవారం ఉత్తర్వులు జారీ చేశారు. నగర శివారులోని సుంకేసుల రోడ్డులో కార్తీక్‌ ఆసుపత్రి వద్ద ఒకటి, జొహరాపురం వై-జంక్షన్‌ వద్ద మరొకటి, నంద్యాల చెక్‌పోస్టు వద్ద ఇంకొకటి ఏర్పాటు చేయనున్నారు. ఒక్కో చెక్‌పోస్టులో ముగ్గురు వేర్వేరు శాఖ అధికారులు, తొమ్మిది మంది హెడ్‌ కానిస్టేబుళ్లు, కానిస్టేబుల్‌ స్థాయి పోలీసులు విధుల్లో ఉంటారు. వీరు మూడు బృందాలుగా విడిపోయి ప్రతి 8 గంటలకు ఒక బృందం చొప్పున మూడు షిఫ్టుల్లో పనిచేస్తారు. ప్రతిరోజు ఉదయం 6 గంటల నుంచి మధ్యాహ్నం 2 వరకు ఒక బృందం, మధ్యాహ్నం 2 నుంచి రాత్రి 10 గంట వరకు మరో బృందం, రాత్రి 10 నుంచి ఉదయం 6 గంటల వరకు మరో బృందం పనిచేస్తుంది. వాహనాలను తనిఖీ చేసి అక్రమంగా తరలించే మద్యం, నగదు, వస్తువులను గుర్తించాల్సి ఉంటుంది. భారీ మోతాదులో నగదు పట్టుబడితే ఆదాయపన్ను శాఖకు అప్పగించాల్సి ఉంటుంది. చెక్‌పోస్టులో అప్రమత్తంగా లేకపోయినా.. విధులకు గైర్హాజరైనా క్రమశిక్షణ చర్యలు తీసుకుంటామని ఆయన హెచ్చరించారు.