శీతల గాలులతో సతమతం

న్యూస్‌టుడే, నిజామాబాద్‌ వ్యవసాయం

ఉత్తర భారతం వాయువ్య దిశ నుంచి దక్షిణం వైపు శీతల గాలులు భూమికి దగ్గరగా వీస్తుండడంతో జిల్లాలో చలి తీవ్రత పెరిగింది. దీనికి తోడు చలిగాలులు ప్రజలను ఉక్కిరిబిక్కిరి చేస్తున్నాయి. పది రోజులుగా కనిష్ఠ ఉష్ణోగ్రతలు సాధారణం కంటే దాదాపు ఐదు డిగ్రీలు పడిపోయాయి. ఛత్తీస్‌గడ్‌, ఒడిశా, విదర్భ ప్రాంతాల్లో ఏర్పడిన ఆవర్తన ద్రోణి ప్రభావంతో రాష్ట్రం వైపు శీతల గాలుల తీవ్రత ఎక్కువైందని వాతావరణశాఖ వెల్లడించింది. దీని తీవ్రత మరో రెండ్రోజుల పాటు ఉంటుందని పేర్కొన్నారు. కనిష్ఠ, గరిష్ఠ ఉష్ణోగ్రతల మధ్య తేడా పది డిగ్రీల మేర ఉండడం కూడా చలి తీవ్రతకు కారణమవుతోందని అధికారులు వివరించారు.

జలుబుతో జనం ఇబ్బంది

చలిగాలులు ప్రజారోగ్యంపై ప్రభావం చూపుతున్నాయి. ముఖ్యంగా జ్వరం, జలుబు, దగ్గుతో ఎక్కువ మంది బాధపడుతున్నట్లు ఆరోగ్య సర్వేలో వెల్లడైంది. గాలిలో తేమ అధికంగా ఉండడంతో చిన్నారులు, బాలింతలు, దీర్ఘకాలిక రోగులు ఇక్కట్లు ఎదుర్కొంటున్నారు. మరోవైపు చలికి వరి పొలాలు సకాలంలో ఎదగడం లేదని రైతులు వాపోతున్నారు.