కూపను ఇచ్చుకో.. వెయ్యి పుచ్చుకో..

విశాలాక్షినగర్‌, న్యూస్‌టుడే: పదోవార్డు పరిధిలోని ఎస్‌ఐజీ.నగర్‌ రామలింగేశ్వర కల్యాణ మండపం వద్ద వైకాపా అభ్యర్థి ఎంవీవీ సత్యనారాయణ మనుషులుగా భావిస్తున్న కొందరు శనివారం రాత్రి కూపన్లు పంపిణీ చేసినట్లు తెలిసింది. కాలనీ వాసులకు భోజనాలు పెట్టించి ఆ కూపన్లు ఉన్నవారికి రూ. వెయ్యి చొప్పున అందించినట్లు తెలిసింది. మహిళలకు గతంలోనే చీరలు అందించినందున పురుషులకు కూపన్లు అందించి వాటిని తీసుకువచ్చిన వారికి రూ. వెయ్యి అందించారంటున్నారు. రహస్యంగా ఈ కార్యక్రమం జరిగినట్లు సమాచారం. ఎన్నికల కోడ్‌ వచ్చిన తొలిరోజునే ఇలా వ్యవహరిస్తే పట్టించుకోవాల్సిన అధికారగణం ఏమి చేస్తున్నట్లు పలువురు ప్రశ్నిస్తున్నారు.