‘కడియం శ్రీహరివి వెన్నుపోటు రాజకీయాలు’

స్టేషన్‌ఘన్‌పూర్‌, న్యూస్‌టుడే : ఎమ్మెల్యే కడియం శ్రీహరి తన రాజకీయ భవిష్యత్తులో మొత్తం వెన్నుపోటు రాజకీయాలకు కేరాఫ్‌ అడ్రస్‌గా నిలిచాడని భారాస మాజీ ఎమ్మెల్యే తాటికొండ రాజయ్య విమర్శించారు. డివిజన్‌ కేంద్రంలోని బస్టాండ్‌ సమీపంలోని అంబేడ్కర్‌ విగ్రహం వద్ద సోమవారం ఏర్పాటు చేసిన విలేకరుల సమావేశంలో మాట్లాడారు. అధికార దాహం కోసం భారాస పార్టీకి వెన్నుపోటు పొడిచి కాంగ్రెస్‌లో చేరాడని మండిపడ్డారు. ప్రస్తుతం నియోజకవర్గ ప్రజలు శ్రీహరి పేరును వింటేనే అసహ్యించుకుంటున్నారని వ్యాఖ్యానించారు. ఆనాడు తెదేపాలో అనేక పదవులు అనుభవించి చంద్రబాబుకు.. భారాసలో కేసీˆఆర్‌కు వెన్నుపోటు పొడిచాడని ఆరోపించారు. కేసీˆఆర్‌ను బ్లాక్‌ మెయిల్‌ చేసి మంత్రి, ఎమ్మెల్సీ, ఎంపీˆ, ఎమ్మెల్యే పదవితో పాటు.. ఆయన కుమార్తెకు ఎంపీˆ టికెట్ తీసుకొచ్చుకొని, చివరికి.. ఉడాయించారని దుయ్యబట్టారు. దేశంలో ఏ వ్యక్తి చేయలేనన్ని బ్లాక్‌ మెయిల్‌ రాజకీయాలు కడియం శ్రీహరి చేస్తున్నాడని అన్నారు. రాష్ట్రంలో ఉన్న మాదిగలంతా కాంగ్రెస్‌కు ఓటు వేయకూడదని నిర్ణయించుకుంటున్నారని తెలిపారు. కేసీˆఆర్‌ తనను పిలిచి ‘నువ్వు రాజీనామా చేసినా.. నేను ఆమోదించలేదని.. నియోజకవర్గ ఇన్‌ఛార్జిగా ప్రకటించి బాధ్యతలు అప్పగించారని’ పేర్కొన్నారు. కాంగ్రెస్‌ అభ్యర్థి కడియం కావ్య ఎప్పుడో ఓడిపోయిందని వివరించారు. నేడు మడికొండలోని సత్యసాయి గార్డెన్‌లో జరిగే నియోజకవర్గ కార్యకర్తల సమావేశం విజయవంతం చేయాలని పిలుపునిచ్చారు. కార్యక్రమంలో భారాస మండలాధ్యక్షుడు మాచర్ల గణేష్‌, జైపాల్‌ రెడ్డి, వారాల రమేష్‌, నాయకులు ఆకుల కుమార్‌, సురేష్‌కుమార్‌, మహేందర్‌రెడ్డి, బాలరాజు, చందర్‌ రెడ్డి తదితరులు పాల్గొన్నారు.