కుప్పం పర్యటనలో నారా భువనేశ్వరి ధ్వజం

ఈనాడు-చిత్తూరు; న్యూస్‌టుడే-కుప్పం పట్టణం: వైకాపా నాయకులు.. రాష్ట్ర వ్యాప్తంగా 80 శాతం వక్ఫ్‌బోర్డు ఆస్తుల్ని, వాటికి సంబంధించిన 30 వేల ఎకరాల భూముల్ని ఆక్రమించారని తెదేపా అధినేత చంద్రబాబు సతీమణి నారా భువనేశ్వరి ఆరోపించారు. చివరికి ప్రార్థనా మందిరాలు, శ్మశానాలనూ వదిలిపెట్టడం లేదని ధ్వజమెత్తారు. అధికార పార్టీ నేతలకు మంచి, మర్యాదన్నదే లేదని విమర్శించారు. చిత్తూరు జిల్లా కుప్పం పురపాలిక పరిధిలో రెండో రోజైన శనివారం భువనేశ్వరి పర్యటించారు. చంద్రబాబు జన్మదినం సందర్భంగా ఉదయం సామగుట్టపల్లె కదిరిబండ నరసింహస్వామి ఆలయంలో పూజలు చేసి కేకు కోశారు. అనంతరం పట్టణంలో ముస్లిం మహిళలతో ‘దిల్‌ కీ బాత్‌’ కార్యక్రమం నిర్వహించి, సీనియర్‌ ప్రజాప్రతినిధులు, ముఖ్య నాయకులతో సమావేశమయ్యారు. ఈ సందర్భంగా ఆమె మాట్లాడుతూ.. ప్రజలు, కార్యకర్తలకే చంద్రబాబు మొదటి ప్రాధాన్యం ఇస్తారని, కుటుంబానికి ఎప్పుడూ రెండో స్థానమేనని పేర్కొన్నారు. ‘దేశంలో ఎక్కడా లేని చెడంతా రాష్ట్రంలోనే ఉంది. ఎవరైనా నోరు విప్పితే చంపుతారు. కేసులు పెట్టి జైళ్లకు పంపిస్తున్నారు. ఇదేం పాలన? సైకిల్‌ తొక్కుకుంటూ వెళ్లి ప్రజల ప్రభుత్వాన్ని తీసుకురావాలి’ అని భువనేశ్వరి ప్రజలకు పిలుపునిచ్చారు.