ఎన్డీయే మహిళా నేతల ధ్వజం

ఈనాడు డిజిటల్‌, అమరావతి: ‘వైకాపా పాలనలో మహిళలపై జరుగుతున్న దాడుల్లో దేశంలోనే ఆంధ్రప్రదేశ్‌ మొదటి స్థానంలోకి చేరింది. సీఎం ఇంటికి సమీపంలోనే దుండగులు భర్త ముందు ఓ మహిళపై అత్యాచారానికి ఒడిగట్టారు. విజయవాడ ఆసుపత్రిలో ఓ దివ్యాంగురాలిపై అఘాయిత్యం చేశారు. జగన్‌ హయాంలో మహిళలపై 1,001, మైనర్‌ బాలికలపై 1,824 అత్యాచారాలు జరిగాయి. 43,340 మంది మహిళలు అదృశ్యమయ్యారు. వీటిపై కనీసం స్పందించని మీరు ఏ మోహం పెట్టుకుని మహిళలను ఓట్లు అడుగుతున్నారు’ అని జనసేన అధికార ప్రతినిధి కీర్తన, భాజపా అధికార ప్రతినిధి యామిని శర్మ, తెదేపా డ్వాక్రా, అంగన్‌వాడీ విభాగ రాష్ట్ర అధ్యక్షురాలు సునీత నిలదీశారు. మహిళలపై జరుగుతున్న దాడులపై సీఎం జగన్‌, మహిళా కమిషన్‌ ఛైర్మన్‌ వాసిరెడ్డి పద్మ ఒక్కసారి కూడా స్పందించలేదని విమర్శించారు. కానీ ఈ ఉదంతాలపై ప్రశ్నించిన జనసేన అధినేత పవన్‌కల్యాణ్‌పై ఎదురుదాడి చేస్తున్నారని, వ్యక్తిగత అంశాలను రాజకీయాల్లోకి లాగుతున్నారని మండిపడ్డారు. జనసేన కేంద్ర కార్యాలయంలో వారు శనివారం విలేకరులతో మాట్లాడారు.