రాష్ట్రంలో మొత్తం 23 లోక్‌సభ స్థానాలకు పోటీ

ఈనాడు, దిల్లీ: ఆంధ్రప్రదేశ్‌లో వచ్చే నెల 13న జరిగే లోక్‌సభ ఎన్నికల్లో పోటీ కోసం కాంగ్రెస్‌ పార్టీ 9 మంది అభ్యర్థులతో తుది జాబితా ప్రకటించింది. ఇప్పటికే 14 స్థానాలకు అభ్యర్థులను ప్రకటించిన విషయం తెలిసిందే. దీంతో మొత్తం 23 లోక్‌సభ స్థానాలకు ఆ పార్టీ అభ్యర్థులను ప్రకటించినట్లయింది. రాష్ట్రంలోని మిగిలిన రెండుస్థానాల్లో ఇండియా కూటమిలో భాగంగా అరకు స్థానంలో సీపీఎం, గుంటూరు నుంచి సీపీఐ పోటీచేయనున్నాయి. తాజా జాబితా ప్రకారం శ్రీకాకుళం నుంచి డాక్టర్‌ పి.పరమేశ్వరరావు, విజయనగరం-బొబ్బిలి శ్రీను, అమలాపురం- జంగా గౌతమ్‌, మచిలీపట్నం-గొల్లు కృష్ణ, విజయవాడ-వల్లూరు భార్గవ్‌, ఒంగోలు-ఇ.సుధాకరరెడ్డి, నంద్యాల-జంగిటి లక్ష్మి నరసింహయాదవ్‌, అనంతపురం- మల్లికార్జున్‌ వజ్జల, హిందూపురం నుంచి బీఏ సమద్‌షహీన్‌ పోటీ చేయనున్నారు. వీటితోపాటు ఝార్ఖండ్‌లోని రెండు స్థానాలకు కాంగ్రెస్‌ పార్టీ అభ్యర్థులను ప్రకటించింది. దీంతో ఇప్పటివరకు దేశవ్యాప్తంగా 295 స్థానాలకు అభ్యర్థులను ప్రకటించినట్లయింది.