ఇప్పటికే ప్రకటించిన పది స్థానాల్లో మార్పులు

ఈనాడు డిజిటల్‌, అమరావతి: శాసనసభ స్థానాలకు సంబంధించి 38 మంది అభ్యర్థులతో కూడిన మరో జాబితాను కాంగ్రెస్‌ పార్టీ సోమవారం ప్రకటించింది. ఇందులో పది స్థానాలకు ఇంతకుముందు ప్రకటించిన వారిని మార్చి, వేరొకరికి టికెట్లు కేటాయించింది. 28 స్థానాల్లో కొత్తవారిని ఖరారు చేసింది. ఇటీవల కాంగ్రెస్‌లో చేరిన వైకాపా నేత, మాజీ ఎమ్మెల్యే ఆమంచి కృష్ణమోహన్‌ చీరాల నుంచి బరిలో దిగనున్నారు. తాజా జాబితాతో ఇప్పటివరకు ఆ పార్టీ 142 స్థానాలకు అభ్యర్థులను వెల్లడించింది. ఇండియా కూటమిలో భాగంగా మరో 16 స్థానాల్లో సీపీఎం, సీపీఐలకు మద్దతు ప్రకటించింది. ఇంకా 17 చోట్ల అభ్యర్థులను ప్రకటించాల్సి ఉంది.