కేంద్ర మంత్రి వీకే సింగ్‌ పిలుపు

ధర్మవరం/పట్టణం, న్యూస్‌టుడే: రాష్ట్రంలో ఎన్టీయే కూటమి అభ్యర్థులను గెలిపించి, మోసపూరిత వైకాపా ప్రభుత్వాన్ని సాగనంపాలని కేంద్ర ఉపరితల రవాణా, రహదారుల శాఖ సహాయ మంత్రి వీకే సింగ్‌ పిలుపునిచ్చారు. శ్రీసత్యసాయి జిల్లా ధర్మవరంలో మంగళవారం భాజపా ఎమ్మెల్యే అభ్యర్థి సత్యకుమార్‌ నామినేషన్‌ కార్యక్రమానికి ఆయన ముఖ్య అతిథిగా హాజరయ్యారు. ఈ సందర్భంగా పట్టణంలో భాజపా, తెదేపా, జనసేన పార్టీల ఆధ్వర్యంలో భారీ ర్యాలీ నిర్వహించారు. ఎన్నికల అధికారికి సత్యకుమార్‌ నామినేషన్‌ పత్రాలు సమర్పించారు. అనంతరం వీకే సింగ్‌ విలేకరులతో మాట్లాడుతూ ధర్మవరంలో చేనేత రంగాన్ని ఆదుకునేందుకు ప్రధాని మోదీతో మాట్లాడి టెక్స్‌టైల్‌ పార్కు ఏర్పాటుకు కృషి చేస్తామని హామీ ఇచ్చారు. అనంతరం సత్యకుమార్‌ మాట్లాడుతూ గ్రామాల్లో కూటమి నాయకులకు వస్తున్న స్పందన చూసి వైకాపాకు ఓటమి భయం పట్టుకుందని పేర్కొన్నారు.