విజయనగరం కోట, న్యూస్‌టుడే: సీఎం జగన్‌ సిద్ధం సభకు జనాలను తరలించేందుకు ఆర్టీసీ డిపోల్లో 80 శాతం బస్సులను కేటాయించడంతో ప్రయాణికులు మంగళవారం తీవ్ర ఇబ్బందులు పడ్డారు. ఉత్తరాంధ్రలోని డిపోల నుంచి 1,100 బస్సులు తరలించినట్లు సమాచారం. విజయనగరం బస్టాండులో పార్వతీపురం, సాలూరు, ఎస్‌ కోట, అనకాపల్లి, సింహాచలం, శ్రీకాకుళం, రాజాం, చీపురుపల్లి మార్గాల్లో వెళ్లేందుకు ప్రయాణికులు బస్టాండులో గంటల సమయం వేచి చూశారు. వృద్ధులు, పిల్లలు నరకయాతన పడ్డారు. అప్పుడప్పుడూ బస్సులు వచ్చినా.. జనం ఎక్కువగా ఉండటంతో తోపులాటలు చోటుచేసుకున్నాయి. కొందరు వేచిచూడలేక అధిక ధరలకు ప్రైవేటు వాహనాలను ఆశ్రయించారు.