ఈనాడు డిజిటల్‌, అమరావతి: సీఎం జగన్‌కు గాయమై రెండు వారాలు గడుస్తున్నా... ప్రజల్ని మభ్యపెట్టి ఓట్లు దండుకోవడానికే ఆయన బ్యాండేజ్‌ తీయడం లేదని తెదేపా పొలిట్‌బ్యూరో సభ్యుడు వర్ల రామయ్య ఎద్దేవా చేశారు. బ్యాండేజ్‌ తీయకపోతే సెప్టిక్‌ అవుతుందని డాక్టర్లు చెబుతున్నా ఆయన వినడం లేదన్నారు. గొడ్డలి వేటు సూత్రధారి అవినాష్‌రెడ్డిని అమాయకుడని జగన్‌ పరిచయం చేయడం ప్రజల్ని వంచించడమేనని ఆగ్రహం వ్యక్తంచేశారు. మంగళగిరిలోని తెదేపా కేంద్ర కార్యాలయంలో శుక్రవారం వర్ల రామయ్య విలేకరులతో మాట్లాడారు. ‘‘ఎంపీ అవినాష్‌రెడ్డిని చిన్నపిల్లోడని అనడంలో జగన్‌ ఔచిత్యమేంటి? అమాయకుడు అనడంలో అర్థం ఏమిటి? గొడ్డలి వేటు ఘటనలో సూత్రధారి అమాయకుడా?’’ అని వర్ల రామయ్య ప్రశ్నించారు.