తెదేపా విద్యార్థి విభాగం అధికార ప్రతినిధి దర్శిత్‌

ఈనాడు డిజిటల్‌, అమరావతి: జగన్‌ ఓ స్టిక్కర్‌ సీఎం అని, ఎన్నికలు ముగిసేదాకా ఆయన తన నుదుటిపై ఉన్న బ్యాండేజ్‌ తీయరని తెదేపా విద్యార్థి విభాగం అధికార ప్రతినిధి పొట్లూరి దర్శిత్‌ ఎద్దేవా చేశారు. మంత్రి వెలంపల్లి శ్రీనివాస్‌ రోజుకో కంటికి బ్యాండేజ్‌ మారుస్తూ.. ఓటర్లను ఏమార్చాలని చూస్తున్నారని విమర్శించారు. ఈ ఎన్నికల్లో వారికి బుద్ధి చెప్పడానికి ప్రజలు సిద్ధంగా ఉన్నారని పేర్కొన్నారు. గులకరాయి తనకు తగిలిందని నాటకాలాడుతున్న జగన్‌.. అయిదేళ్లుగా తమపై దాడి చేస్తూనే ఉన్నారని ఆగ్రహం వ్యక్తం చేశారు. విజయవాడలోని తెదేపా కార్యాలయంలో తలకు, కంటికి, చేతులకు బ్యాండేజ్‌లు కట్టుకుని టీఎన్‌ఎస్‌ఎఫ్‌ నాయకులు శుక్రవారం నిరసన తెలిపారు. అనంతరం విలేకర్లతో మాట్లాడారు. ‘‘ఈ అయిదేళ్లలో వందల మంది యువకులు ఉపాధి, ఉద్యోగావకాశాలు లేక ఆత్మహత్యలు చేసుకున్నారు. మెగా డీఎస్సీ నిర్వహిస్తానని ప్రతిపక్షనేతగా హామీ ఇచ్చిన జగన్‌.. అధికారంలోకి వచ్చాక  ఉపాధ్యాయ పోస్టులు భర్తీ చేయలేదు’’ అని మండిపడ్డారు.