గుడివాడలో బూత్‌ ఏజెంట్లుగా నియమించేందుకు వైకాపా ప్రలోభాలు

గుడివాడ గ్రామీణం, న్యూస్‌టుడే: గుడివాడలో వైకాపా నాయకులు వాలంటీర్లతో రాజీనామా చేయించి ఒక్కొక్కరికి రూ.2.5 లక్షలిచ్చి పోలింగ్‌ బూత్‌ ఏజెంట్లుగా నియమిస్తున్నారని.. ఈ మేరకు కొందరు నాయకులు వాలంటీర్లకు ప్రత్యేక శిక్షణ ఇస్తున్నారని గుడివాడ మున్సిపల్‌ మాజీ ఛైర్మన్‌ యలవర్తి శ్రీనివాసరావు, తెదేపా పట్టణ అధ్యక్షుడు దింట్యాల రాంబాబు ఆరోపించారు. తెదేపా కార్యాలయం ప్రజావేదికలో సోమవారం వారు విలేకరులతో మాట్లాడారు. ఓటమి భయంతో వైకాపా నాయకులు వాలంటీర్లను ప్రలోభాలకు గురి చేసి వారితో రాజీనామా చేయిస్తున్నారని ధ్వజమెత్తారు. వైకాపా నూతన మ్యానిఫెస్టోపై వారికి శిక్షణ ఇచ్చి.. అధికారంలోకి మళ్లీ వైకాపానే వస్తుందని..తామే మళ్లీ ఇంటింటికీ వచ్చి అన్ని పథకాలనూ అందించేదని చెప్పి ఓటర్లను భయపెట్టేలా చూడాలని వాలంటీర్లకు వైకాపా నాయకులు నూరిపోస్తున్నారని ఆరోపించారు. వైకాపా ప్రలోభాలకు వాలంటీర్లు లొంగిపోతే.. తెదేపా అధికారంలోకి వచ్చాక ఇచ్చే రూ.10 వేల వేతనం కోల్పోతారని వారు హెచ్చరించారు. ఒక సారి వచ్చే రూ.2.5 లక్షలకు ఆశపడి జీవితాంతం వచ్చే మేలును వదులుకోవద్దని హితవు పలికారు.