ఈనాడు, కాకినాడ: హైకోర్టుకు ఎన్నికల సంఘం నివేదించిన నేపథ్యంలో ఉమ్మడి తూర్పుగోదావరి జిల్లాలో పలువురు స్వతంత్ర, ఇతర పార్టీల అభ్యర్థులకు కేటాయించిన గాజుగ్లాసు గుర్తును జిల్లాల ఎన్నికల అధికారులు వెనక్కు తీసుకున్నారు. కాకినాడ జిల్లాలోని కాకినాడ సిటీ నియోజకవర్గంలో తెలుగు జనతా పార్టీ.. తుని, ప్రత్తిపాడులలో దళిత బహుజన పార్టీ.. పెద్దాపురం, జగ్గంపేట నియోజకవర్గాల్లో స్వతంత్ర అభ్యర్థులకు కేటాయించిన గాజుగ్లాసు గుర్తును రద్దు చేశారు. వారికి ప్రత్యామ్నాయంగా వేరే గుర్తులను బుధవారం కేటాయించారు. తూర్పుగోదావరి జిల్లా రాజమహేంద్రవరం లోక్‌సభ స్థానానికి పోటీ చేస్తున్న రాష్ట్రీయ ప్రజా కాంగ్రెస్‌ (సెక్యులర్‌) అభ్యర్థికి కేటాయించిన గాజుగ్లాసు గుర్తును మార్చారు.