పోలీసులకు హైకోర్టు ఆదేశం

ఈనాడు, అమరావతి: భారత చైౖతన్య యువజన పార్టీ (బీసీవైపీ) అధ్యక్షుడు బోడే రామచంద్రయాదవ్‌పై నమోదు చేసిన హత్యాయత్నం కేసులో ఆయనపై బలవంతపు చర్యలొద్దని చిత్తూరు జిల్లా సదుం పోలీసులను హైకోర్టు ఆదేశించింది. ఎన్నికల ప్రచారానికి ఆటంకం కల్పించొద్దని స్పష్టం చేసింది. పోలీసు విధులకు అవరోధం కల్పించారని పేర్కొంటూ రామచంద్రయాదవ్‌పై సదుం పోలీసులు నమోదు చేసిన మరో కేసులో సుప్రీంకోర్టు మార్గదర్శకాలను అనుసరించి సీఆర్‌పీసీ సెక్షన్‌ 41ఏ నోటీసు నిబంధనలను పాటించాలని స్పష్టం చేసింది. హైకోర్టు న్యాయమూర్తి జస్టిస్‌ కె.శ్రీనివాసరెడ్డి గురువారం ఈ మేరకు ఉత్తర్వులిచ్చారు. పిటిషనర్‌ తరఫున సీనియర్‌ న్యాయవాది వైవీ రవిప్రసాద్‌, న్యాయవాది పీవీజీ ఉమేశ్‌చంద్ర వాదనలు వినిపించారు. రాజకీయ కక్షతో పిటిషనర్‌పై తప్పుడు కేసులు నమోదు చేశారన్నారు. ఎన్నికల ప్రచారంలో పాల్గొనకుండా తీవ్ర ఇబ్బందులకు గురిచేస్తున్నారని తెలిపారు.