అధికారుల సోదాల్లో బహిర్గతం

విశాఖపట్నం (పెదవాల్తేరు), న్యూస్‌టుడే: విశాఖ తూర్పు నియోజకవర్గ వైకాపా అభ్యర్థి ఎంవీవీ సత్యనారాయణ కార్యాలయంలో సోదాలు నిర్వహించిన ఎన్నికల అధికారులు భారీ సంఖ్యలో తాయిలాలను గుర్తించారు. లాసన్స్‌బే కాలనీలోని ఆయన కార్యాలయంలో శుక్రవారం రాత్రి 9 గంటల నుంచి సుమారు 6 గంటల పాటు ఈ సోదాలు సాగాయి. తాయిలాలను ఎలా పంచాలనే విషయంపై అనుచరగణానికి శిక్షణ ఇస్తుండగా.. నాలుగు బృందాలు దాడులు చేశాయి. ఈ సమయంలో రూ.30 వేల నగదు, 500 చీరలు, 400 టీషర్టులు, ఆటోడ్రైవర్ల యూనిఫామ్స్‌, 3 డిజిటల్‌ వాచ్‌లు, రూ.5 వేలు, రూ.4 వేలు, రూ.3 వేల టోకెన్లను గుర్తించారు. వాటిని స్వాధీనం చేసుకుని విశాఖ మూడో పట్టణ పోలీసులకు అప్పగించారు. ఈ తనిఖీల్లో 30 మంది అధికారులు పాల్గొన్నారు. కొన్ని రోజులుగా సిద్ధం సభల్లో ఈ పంపకాలు జరుగుతుండటంతో ఎన్నికల అధికారులకు అందిన సమాచారం మేరకు   ఈ దాడులు నిర్వహించారు. ఆ సమయంలో ఎంవీవీ, ఆడిటర్‌ జి.వెంకటేశ్వరరావు (జీవీ) అక్కడే ఉన్నారు. పోలీసులు కేసు నమోదు చేసి దర్యాప్తు చేస్తున్నారు.