పొన్నూరులో కూటమి నేతల నిరసన

పొన్నూరు, న్యూస్‌టుడే: గుంటూరు జిల్లా పొన్నూరు పట్టణం జీబీసీ రహదారిలో ఇటీవల సీఎం పర్యటన సందర్భంగా నిర్మించిన హెలిప్యాడ్‌ను వైకాపా నాయకులు శనివారం ధ్వంసం చేశారు. జనసేన పార్టీ అధినేత పవన్‌ కల్యాణ్‌ ఆదివారం పొన్నూరు ఎన్నికల ప్రచారంలో పాల్గొంటున్న నేపథ్యంలో కూటమి నేతలు ఏర్పాట్లు చేస్తున్నారు. అందులో భాగంగా హెలిప్యాడ్‌ నిర్మాణ అనుమతికి రోడ్డు భవనాల శాఖాధికారులకు దరఖాస్తు చేసుకున్నారు. దానిని పరిశీలించిన అధికారులు.. సీఎం దిగిన హెలిప్యాడ్‌ ఉపయోగించుకోవాలని సూచించారు. దాంతో అదే వినియోగించుకోవాలని కూటమి నేతలు భావించారు. ఈ విషయం తెలుసుకున్న వైకాపా నాయకులు హడావుడిగా పొక్లెయిన్‌ను పంపించి ఆ ప్రాంతాన్ని ధ్వంసం చేశారు. దీనిపై కూటమి నేతలు ఆందోళనకు దిగారు. అధికార పార్టీకి వ్యతిరేకంగా నినాదాలు చేశారు. జనసేన పార్టీ జిల్లా అధ్యక్షుడు గాదె వెంకటేశ్వరరావు తదితరులు ఆ ప్రాంతాన్ని పరిశీలించి, వైకాపా నేతల తీరుపై ఆగ్రహం వ్యక్తం చేశారు. అదే ప్రాంతంలో పవన్‌ దిగేందుకు హెలిప్యాడ్‌ను సిద్ధం చేస్తున్నారు.