ఈనాడు, అనకాపల్లి-న్యూస్‌టుడే, అనకాపల్లి, కశింకోట: ప్రధాని నరేంద్రమోదీ మరోసారి రాష్ట్రానికి రాబోతున్నారు. ఈ ఎన్నికల్లో భాజపాతో తెదేపా, జనసేన కూటమిగా జట్టుకట్టిన తర్వాత తొలిసారిగా చిలకలూరిపేట బహిరంగసభకు వచ్చిన మోదీ.. తాజాగా రాజమహేంద్రవరంతో పాటు అనకాపల్లి జిల్లాలో పర్యటించేందుకు సోమవారం రానున్నారు. తొలుత రాజమహేంద్రవరం లోక్‌సభ పరిధిలోని వేమగిరిలో మధ్యాహ్నం 3.30గంటలకు నిర్వహించనున్న బహిరంగ సభలో ప్రధాని మాట్లాడనున్నారు. అనంతరం సాయంత్రం 5.40గంటలకు అనకాపల్లి జిల్లా కశింకోట మండలం తాళ్లపాలెం సమీపంలో నిర్వహించనున్న సభలో ప్రసంగిస్తారు. ముఖ్య అతిథులుగా తెదేపా, జనసేన అధినేతలు చంద్రబాబునాయుడు, పవన్‌కల్యాణ్‌ పాల్గొననున్నారు.