డీజీపీ అసమర్థతే కారణమని లేఖ

ఈనాడు, అనకాపల్లి: అనకాపల్లి జిల్లా దేవరాపల్లి మండలం తారువలో తనతో పాటు, భాజపా కార్యకర్తలపై జరిగిన వైకాపా మూక దాడిపై భాజపా ఎంపీ అభ్యర్థి సీఎం రమేశ్‌ కేంద్ర ఎన్నికల సంఘానికి (ఈసీ) ఆదివారం ఫిర్యాదు చేశారు. ‘పోలీసులు నిర్లక్ష్యం, ఏకపక్ష ధోరణి కారణంగానే విపక్షాలపై దాడులు జరుగుతున్నాయి. అనకాపల్లి జిల్లాలో ఉపముఖ్యమంత్రి బూడి ముత్యాలనాయుడి ఊరిలో మాపై జరిగిన దాడికి పోలీసులే కారణం. వారిపై చర్యలు తీసుకోవాలి. దీనంతటికీ కారణమైన రాష్ట్ర డీజీపీ రాజేంద్రనాథరెడ్డిని మార్చాలి’ అని కేంద్ర ఎన్నికల కమిషనర్‌ రాజీవ్‌కుమార్‌కు ఆయన లేఖ రాశారు. ‘ప్రచారానికి వెళ్లిన మా కార్యకర్తలను గాయపరిచారని పరామర్శించడానికి వెళితే నన్ను రెండు గంటల పాటు ఊరిలోకి అడుగుపెట్టనివ్వకుండా అడ్డుకున్నారు. పోలీసులకు ముందుగా చెప్పి వెళ్లినా ఏమాత్రం రక్షణ చర్యలు చేపట్టలేదు. మాపై భౌతిక దాడికి పాల్పడ్డారు. మా కార్లు ధ్వంసం చేశారు. తారువ నుంచి ప్రాణాలతో బయటపడతామనుకోలేదు. ఎస్పీ మురళీకృష్ణ, డీఎస్పీ అప్పలనాయుడు నిర్లక్ష్యంగా వ్యవహరించారు. వారిపై చర్యలు తీసుకోవాలి’ అని లేఖలో కోరారు.