ఇంటింటికీ స్లిప్పులు పంచుతున్న వైకాపా నాయకులు

తాడిపత్రి, న్యూస్‌టుడే: ఓటర్లను ప్రలోభ పెట్టేందుకు వైకాపా నాయకులు అనంతపురం జిల్లా తాడిపత్రిలో డబ్బుల పంపిణీకి స్లిప్పులను ఇస్తున్నారు. ఇంటింటికీ వెళ్లి ఒక్కో ఓటరుకు రూ.2 వేలు ఇస్తామని నమ్మబలుకుతున్నారు. ఒక కుటుంబంలో 4 ఓట్లు ఉంటే స్లిప్పుపై ‘8’ అని రాసి ఇస్తున్నారు. ఈ స్లిప్పులను జాగ్రత్తగా దాచుకోవాలని కొంతమంది రహస్యంగా వచ్చి స్లిప్పుల్లో ఉన్నదాని ప్రకారం డబ్బులిచ్చి వెళతారని చెబుతున్నారు. మెయిన్‌ బజార్‌, బంకమడి వీధి, జయనగర్‌ కాలనీ, శ్రీరాములపేట, అంబేడ్కర్‌నగర్‌, సీపీఐ కాలనీ, టైలర్స్‌ కాలనీ, విజయనగర్‌ కాలనీల్లో సోమవారం ఇంటింటా తిరుగుతూ స్లిప్పులిచ్చారు. వైకాపా ప్రజాప్రతినిధి అనుచరులు యల్లనూరు, పుట్లూరు నుంచి వచ్చి తాడిపత్రిలో డబ్బులు పంచుతున్నారనే ఆరోపణలున్నాయి. పోస్టల్‌ బ్యాలెట్‌ కోసం ఉద్యోగులకు రూ.2 వేల నుంచి రూ.3 వేల వరకు వైకాపా నాయకులు పంచారు. డబ్బులు తీసుకున్న ఉద్యోగుల ఇళ్ల వద్దకు సోమవారం వెళ్లి ఎవరికి ఓటేశారంటూ ఆరా తీశారు.