కనిగిరి నియోజకవర్గంలో వైకాపా నాయకుల బరితెగింపు

హనుమంతునిపాడు, న్యూస్‌టుడే: తాము ఏమి చెప్పినా వాలంటీర్లు వింటారనుకుంటున్న వైకాపా నాయకులకు వారు ఝలక్‌ ఇస్తున్నారు. ప్రకాశం జిల్లా కనిగిరి నియోజకవర్గం హనుమంతునిపాడు మండలంలో 14 గ్రామ సచివాలయాల పరిధిలో 142 మంది వాలంటీర్లు పనిచేస్తున్నారు. వారిని రాజీనామా చేయమని అధికార పార్టీ నాయకులు ఒత్తిడి చేసినా ఫలితం లేకపోయింది. దీంతో సోమవారం వైకాపా నాయకులు రూ.5 వేల వంతున వాలంటీర్లకు డబ్బులిచ్చి బలవంతంగా 22 మందిచేత రాజీనామాలు చేయించారు. మరోవైపు గతంలో రాజీనామా చేసిన 22 మందికి అప్పట్లో ఏమీ ఇవ్వకపోవడంతో తాజాగా విషయం రచ్చకెక్కింది. మొత్తంగా ఇప్పటివరకు 44 మంది మాత్రమే రాజీనామాలు ఇచ్చారు. మిగిలిన వారు ససేమిరా అంటుండటంతో బేరసారాలకు దిగుతున్నారు. రాబోయేది తమ ప్రభుత్వమేనని.. మాట వినకపోతే ఈ సారి కొత్తవారిని నియమించుకుంటామని బెదిరిస్తున్నట్లు కొందరు వాలంటీర్లు వాపోయారు.