అసత్య ప్రచారం చేస్తున్నారని మంత్రి రజిని ఫిర్యాదు

గుంటూరు(పట్టాభిపురం), న్యూస్‌టుడే: గుంటూరు ఎంపీ తెదేపా అభ్యర్థి డాక్టర్‌ పెమ్మసాని చంద్రశేఖర్‌, గుంటూరు పశ్చిమ తెదేపా అభ్యర్థి గళ్లా మాధవి, తెదేపా నేత మల్లెల రాజేశ్‌ నాయుడులపై పట్టాభిపురం ఠాణాలో కేసు నమోదైంది. చంద్రశేఖర్‌, మాధవి, రాజేశ్‌ నాయుడులు గుంటూరు పశ్చిమ నియోజకవర్గ ఎన్నికల ప్రచారంలో తాను అవినీతికి పాల్పడినట్లు అసత్యాలు ప్రచారం చేశారని మంత్రి విడదల రజిని పోలీసులకు ఫిర్యాదు చేశారు. ఎన్నికల నియమావళికి విరుద్ధంగా తనపై అసత్యాలు ప్రచారం చేస్తున్నారని పేర్కొన్నారు. ఈ మేరకు పోలీసులు ఆ ముగ్గురిపై పలు సెక్షన్ల కింద ఆదివారమే కేసులు నమోదు చేయగా.. ఆ విషయం సోమవారం వెలుగులోకి వచ్చింది.