కాకినాడ కలెక్టరేట్‌, న్యూస్‌టుడే: కాకినాడ నగరంలో ఈ నెల 11న జనసేన అధినేత పవన్‌కల్యాణ్‌ రోడ్డుషో, సభ జరగనీయకుండా వైకాపా కుయుక్తులు పన్నింది. ఎన్నికల ప్రచారం చివరి రోజు శనివారం మధ్యాహ్నం నుంచి సాయంత్రం వరకు కాకినాడలోని వివిధ ప్రాంతాల్లో పవన్‌కల్యాణ్‌ పర్యటిస్తారని తెలుసుకున్న వైకాపా అడ్డుకోవడానికి కుట్ర పన్నింది. అదే రోజున నగరంలోని ఎనిమిది కీలక ప్రాంతాల్లో ప్రాంతాల్లో రోడ్‌షో, సభలు నిర్వహించేందుకు పోలీసుశాఖ, రిటర్నింగ్‌ అధికారి నుంచి వైకాపా నాయకులు అనుమతులు పొందారు. ఈ నెల 11న పవన్‌ రోడ్డుషో, సభకు అనుమతి ఇవ్వాలని గురువారం తెదేపా నాయకులు పోలీసులకు దరఖాస్తు చేశారు. దీనికి కాకినాడ డీఎస్పీ అనుమతి నిరాకరించారు. దీనిపై తెదేపా నాయకులు మండిపడుతున్నారు. ఈ వ్యవహారంపై కాకినాడ నగర నియోజకవర్గం రిటర్నింగ్‌ అధికారి జె.వెంకట్రావును ‘న్యూస్‌టుడే’ సంప్రదించగా.. వైకాపా అనుమతులు తీసుకుందని, పవన్‌కల్యాణ్‌ సభకు అనుమతి ఇస్తే శాంతిభద్రతల సమస్య ఏర్పడుతుందని డీఎస్పీ చెబుతున్నారని ఆయన తెలిపారు.