ప్రశ్నించిన వారిపై వైకాపా కార్యకర్తల దాడి

గంగూరు(పెనమలూరు), న్యూస్‌టుడే: వైకాపా కార్యకర్తలు కృష్ణా జిల్లా పెనమలూరు మండలం గంగూరులో వీరంగం సృష్టించారు. పెనమలూరు వైకాపా అభ్యర్థి, మంత్రి జోగి రమేష్‌ గురువారం సాయంత్రం ఇక్కడ ఎన్నికల ప్రచారం నిర్వహించారు. ఈ సందర్భంగా గంగూరు కూడలి వద్ద విద్యుత్తు స్తంభానికి కట్టి ఉన్న తెదేపా జెండాలను కొందరు వైకాపా కార్యకర్తలు ఊడదీసి కాళ్లతో తొక్కడంతో తెదేపా సానుభూతిపరులు వారిని వారించడానికి యత్నించారు. దీంతో వైకాపా కార్యకర్తలు ఒక్కసారిగా తెదేపా కార్యకర్తలపై విరుచుకుపడి చితకబాదారు. ఈ దాడిలో పెనమలూరు, గంగూరులకు చెందిన వైకాపా కార్యకర్తలున్నట్లు తెదేపా శ్రేణులు ఆరోపిస్తున్నాయి. సీఆర్‌పీఎఫ్‌, పెనమలూరు పోలీసులు రంగంలోకి దిగి ఇరువర్గాలను చెదరగొట్టారు.