పెనమలూరు: కృష్ణాజిల్లా పెనమలూరు నియోజకవర్గంలో ఓటర్ల ప్రలోభాల కోసం ఉంచిన వివిధ రకాల వస్తువుల్ని పోలీసులు పట్టుకున్నారు. గంగూరు ప్రాంతంలోని ఓ అపార్ట్‌మెంట్‌లో పెనమలూరు వైకాపా అభ్యర్థి జోగి రమేశ్‌ అద్దెకు తీసుకున్నారు. అందులో ఓటర్లను ప్రలోభ పెట్టేందుకు గృహోపకరణ వస్తువులతో పాటు నగదు దాచి ఉంచారని సీ విజిల్‌ యాప్‌ ద్వారా ఫిర్యాదు అందడంతో ఫ్లయింగ్‌ స్క్వాడ్‌ అక్కడికి వెళ్లింది. తాళం వేసి ఉన్న ఫ్లాట్‌లోకి ప్రవేశించడానికి గంటన్నర సమయం పట్టింది. పెనమలూరు పోలీసుల సహకారంతో తాళం పగులగొట్టి లోపలికి వెళ్లిన అధికారులు.. వైకాపాకు సంబంధించిన పింగాణి సెట్స్‌, ప్లాస్క్‌లు ఇతర వస్తువుల్ని గుర్తించారు. వీటితో పాటు వైకాపా అభ్యర్థి జోగి రమేశ్‌ ఫొటో ముద్రించి ఉన్న టోపీలు, టీ షర్ట్స్‌, బ్యాగ్‌లు స్వాధీనం చేసుకున్నారు.