వ్యవసాయ రుణాలపై వడ్డీ రాయితీ.. కేంద్ర కేబినెట్‌ నిర్ణయం

దిల్లీ: స్వల్పకాలిక వ్యవసాయ రుణాలపై వడ్డీ రాయితీ పునరుద్ధరించాలని కేంద్ర కేబినెట్‌ నిర్ణయించింది. రూ.3 లక్షల వరకు ఉన్న రుణాలపై 1.5 శాతం చొప్పున రాయితీ ఇవ్వనున్నారు. ఈ రాయితీ మొత్తాన్ని రుణాలు జారీ చేసే ఆర్థిక సంస్థలకు కేంద్రం చెల్లిస్తుంది. ప్రధాని మోదీ నేతృత్వంలో బుధవారం జరిగిన కేబినెట్‌ సమావేశంలో ఈ మేరకు నిర్ణయం తీసుకున్నారు. కేబినెట్‌ సమావేశంలో తీసుకున్న నిర్ణయాలను కేంద్ర మంత్రి అనురాగ్‌ ఠాకూర్‌ మీడియాకు వెల్లడించారు.

కేబినెట్‌ తీసుకున్న వడ్డీ రాయితీ నిర్ణయం వల్ల వ్యవసాయ రంగానికి రుణ లభ్యత పెరుగుతుందని కేంద్రం పేర్కొంది. 2022-23 నుంచి 2024-25 ఆర్థిక సంవత్సరాలకు గానూ ఈ స్కీమ్‌ వర్తిస్తుందని తెలిపింది. దీనివల్ల రూ.34,856 కోట్లు కేంద్రంపై భారం పడుతుందని పేర్కొంది. ప్రభుత్వ, ప్రైవేటు రంగ బ్యాంకులు, స్మాల్‌ఫైనాన్స్‌, రీజినల్‌ రూరల్‌ బ్యాంకులు, కో-ఆపరేటివ్‌, ప్రాథమిక పరపతి సంఘాలకు ఈ వడ్డీ రాయితీ వర్తిస్తుందని కేంద్రం వెల్లడించింది. రైతులు తీసుకొనే స్వల్పకాలిక రుణాలకు ఎప్పటిలానే 4 శాతం వడ్డీ వర్తిస్తుంది.

• కొవిడ్‌ కారణంగా దెబ్బతిన్న ఆతిథ్య రంగానికి ఊతమిచ్చేందుకు కేబినెట్‌ మరో కీలక నిర్ణయం తీసుకుంది. హాస్పిటాలిటీ, అనుబంధ రంగాల్లో సేవలందిస్తున్న సంస్థలకు ఎమర్జెన్సీ క్రెడిట్‌ లైన్‌ గ్యారెంటీ స్కీమ్‌ (ECLGS)ను ప్రకటించింది. ప్రస్తుతం ఈ స్కీమ్‌ కింద అందిస్తున్న రూ.4.5 లక్షల కోట్లకు మరో రూ.50వేల కోట్లు అదనంగా కేటాయించింది. ఈ మొత్తాన్ని హాస్పిటాలిటీ రంగానికి ప్రత్యేకించింది. ఇప్పటి వరకు అత్యవసర రుణ పథకం కింద రూ.3.67 లక్షల కోట్లు మంజూరు చేసినట్లు కేంద్రం తెలిపింది. కొవిడ్‌ సమయంలో దెబ్బతిన్న రంగాలకు ఊతమిచ్చేందుకు ఈ పథకాన్ని కేంద్రం ప్రకటించిన సంగతి తెలిసిందే.